KUCHING: Opis Pengerai Nengeri Sarawak ngenukuka dua kluster baru nyadi ba dua buah rumah panjai iya nya Kluster Sungai Tuah, Kanowit enggau Kluster Sungai Ngungun, Kanowit kemari.
Sekretariat Komiti Mutar Penusah Ngenyit Nengeri Sarawak (JPBNS) nengah siti penerang madahka kluster Sungai Tuah nyadi ketegal berampit ba peranak rumah panjai nya ti bepun ari pengawa rabat kena 12 April (Hari Satu).
Ku iya, nya ditangka enggau pengawa sembiang malam kena 12 nyentuk 14 April 2021 ti bela digulu bala kaban belayan ari pelilih Miri, Julau enggau Sibu.
"Indeks kes tu iya nya siku orang in du peranak menua nya ti beumur 41 taun ke ditemu nengah peresa individu ke bisi kelai ba Sepital Sibu pengudah ke diasuh ngagai sebuah sepital peribit di Pelilih Sibu kena 16 April 2021.
"Asil pansik enggau peresa aktif ba kontak semak kes indeks tu enggau peranak rumah panjai, tetemuka bisi 30 kes positif COVID-19," ku iya.
Ku iya, semua 83 individu udah diperesa ba kluster tu naka kemari lalu 52 kes ditemu negatif peresa rT-PCR.
Semua 31 kes ti ditemu positif udah diasuh berubat ngagai Sepital Sibu enggau Sepital Kanowit sereta udah dipasukka ngagai PKRC ari baruh Hospital Sibu ngambika dibagi ari orang bukai enggau di perubat.
Kluster Kluster Sungai Ngungun ke alai indeks kesiya nya siku lelaki orang lunggar umur ti beumur 67 taun dirampit komuniti di Pelilih Kanowit maya ke berubat ba sepital.
Nya udah berampit ngagai peranak rumah panjai.
"Asil pansik enggau peresa ba sida sebilik, kontak kasual enggau peresa dipejalaika ba peranak rumah panjai nya tetemuka 25 ari nya positif COVID-19.
"Bisi 39 iku agi individu negatif COVID-19 pengudah peresa keterubah rT-PCR," ku iya.
Semua 26 kes ti ditemu positif COVID-19 ba kluster udah diasuh berubat ngagai Sepital Kanowit lalu udah dipasukka ba PKRC ari baruh Sepital Sibu.
Kelimpah ari nya, penyampau kluster ti agi aktif bisi 63 kluster, lalu 18 kluster ngerikodka 144 penambah kes baru lalu 45 kluster nadai ngerekidka penambah kes
Berebak enggau nya, pelilih Telang Usan udah betukar ngagai status Kuning ari Gadung pengudah ke ngerikodka siti kes berampit, kemari.
Tu ngujungka penyampau pelilih menua ke bestatus Kuning nambah ngagai 10 pelilih menua lalu semina siti pelilih menua ke bestatus gadung, iya nya Simunjan.
Pelilih Matu udah betukar ngagai status Mirah ari status Oren pengudah ke ngerikodka 43 kes berampit dalam timpuh 14 hari ke udah.
Penyampau pelilih menua ke bestatus Mirah udah nambah ngagai 22 pelilih menua lalu pelilih menua ke bestatus orang nurun ngagai tujuh pelilih menua.