BINTULU: Semua 100 iku sida ti positif COVID-19 ti enda ulih digiga ba bagi menua tu udah datai madahka diri kena Hari Minggu tu tadi, pia ku Direktor Pengerai Bagi Menua Bintulu Dr Melvin Chung Hsien.
Nitih ku iya, asil bantu Polis Diraja Malaysia (PDRM) enggau berita ti disadungka nengah media nyengkaum media rama, semua individu nya mujur ditemu lalu datai ke sepital ngambika diperubat.
“Semua pesakit nya udah betelefon ke Opis Pengerai Bagi Menua Bintulu enggau Palan Nagang sereta Berisiko Baruh (PKRC) COVID-19,” ku iya maya aum media ba Bilik Aum Sri Bintulu ba Wisma Residen kilah ensana.
Ku iya nerang, pesakit tu empu ti udah betelefon ngagai Opis Pengerai Bagi Menua Bintulu pengudah Kaban Parlimen Bintulu Datuk Seri Tiong King Sing madahka pekara nya nengah penerang iya ba media rama Facebook iya empu kena Hari Minggu tu tadi.
Ungkup tuju ti sama, ku iya, raban sida nerima bantu ari Balai Polis Diraja Malaysia (PDRM) kena nyidi sereta betelefon enggau pesakit ti tusah deka digiga.
Kena Hari Minggu nyin tadi, Tiong dalam media rama Facebook iya madahka lebih 100 iku ti disahka positif COVID-19 di Bintulu dalam timpuh 12 nyentuk 21 April lalu enda ulih ditelefon ketegal ti meri penerang ke pelesu, lalu tu ngujungka raban sepital napi penanggul ngiga sida tu.
Residen Bagi Menua Bintulu Jack Aman Luat enggau Ketuai Polis Pelilih Bintulu Superintenden Zulkipli Suhaili entara ti bisi datai maya nya.