MIRI: Peminta nyukat tanah Hak Adat Bumiputera (NCR) di Long Terawan ari baruh Seksyen 6 lalu ditangkanka Seksyen 18 digaga enda berunding sereta berandau dulu enggau majoriti peranak di menua nya.
Peranak kampung Dennis Along ke mega Ketuai Pemadah Parti Keadilan Rakyat (PKR) Baram dalam aum media ditu ensana madah, peminta ti dikenataika ngagai Kepala Menteri Datuk Patinggi Abang Johari Tun Openg, lebuh kenemuai ngagai genturung pendiau nya pun bulan tu tadi, enda ngarika semua raban bansa Berawan-Tering dia.
“Peminta nyukat tanah NCR ari baruh Seksyen 6 lalu ditangkanka Seksyen 18 digaga siku ketuai raban bansa dia, iya nya Kunsilor Garry Hashim Wan (Kaban Opis Kaunsil Pelilih Marudi).
“Peranak din (Long Terawan) nadai dipadahka dulu ari nya tauka dibai berunding tauka berandau sentang isu tu sebedau dikenataika ngagai Kepala Menteri,” ku Dennis.
Taja pia ku iya, iya berasai gaga ati laban lebuh Kepala Menteri bejaku di Long Terawan lebuh ke nemuai nya, bisi nyebut pasal peminta nyukat tanah nya.
“Enti iya (kepala menteri) nadai nyebut pasal peminta nya maya nya, kami enggau peranak genturung pendiau ditu enda nemu sentang pekara nya, amat enda nemu bisi peminta ke baka nya,” ku iya.
Ku Dennis, iya berasai enda lantang ati enggau pengawa Garry nya seraya madahka Garry nadai kuasa ngenataika peminta nya kelimpah ari ketuai bansa, pengudah berunding sereta berandauka pekara nya enggau semua peranak genturung pendiau dia.
“Kami mantah (pemintaan) nyukat tanah nya laban nadai dibai berandauka pekara nya dulu, tambah mega kami nadai diberi penerang sentang nya,” ku Dennis.
Berebak enggau nya, iya madahka deka jampat nulis surat ngagai Abang Johari sentang peminta nya, laban ku iya, nya enda ngarika peneka majoriti peranak Berawan-Tering di Long Terawan.
Berebak enggau nya, Abang Johari lebuh ke nemuai ngagai ke Long Terawan pun bulan tu tadi, madahka bisi nerima peminta nyukat tanah NCR di Long Terawan.
Sama bisi ba aum media nya, Kaban Parlimen Miri Dr. Teo Yu Kheng ke mega Ketuai PKR Miri, Mandal Chairman PKR Sarawak ke mega Ketuai PKR Pampang Baram Roland Engan enggau sekeda kaban komiti pampang parti nya.