SIBU: Mensia mayuh ke nemu sentang orang ti ngelanggar Prosedur Operasyen Standard (SOP) maya Atur Nagang Pemindah Bisi Penetap (PKPB) enggau ngatur parti tauka gempuru tau madah ngagai Bilik Operasyen COVID-19 Sibu.
Chairman Opis Kaunsil Mengeri Sibu (MPS), Clarence Ting madahka Bilik Operasyen COVID-19 Sibu tau ditelefon nengah lumur 084-323224 tauka nengah Whatsapp 013-9994158.
“Nyema orang diau besemak tauka bisi orang ngatur parti tauka begempuru bebala mayuh, tau anjung gambar tauka betelefon ngagai lumur tu.
“Nyadi mih peranak menua ke ibuh kena munaska pengelekai COVID-19,” ku iya lebuh ‘live’ ngena Facebook begulai enggau Sekretari Politik Kepala Menteri, Michael Tiang kemari.
Ku Ting, di menua baka Australia enggau sekeda menua bukai, enti bisi enam nyentuk lapan iku, udah tau dikumbai begelumu sereta tau ditinggang ukum.
Taja pia ku iya, menua kitai nadai netapka penyampau baka menua bukai kena nagang mensia mayuh begempuru.
“Ngagai orang ke deka ngatur parti, aku ngelalau sida anang dulu laban COVID-19 tau berampit nengah chara nya,” ku iya.
Berebak enggau nya, Ting madahka pandemik COVID-19 di Sibu agi balat pengudah ke ngerikod 90 kes kena 26 April lalu 84 kes kena 25 April tu tadi.
“Utai ke nyadi diatu, COVID-19 di Sibu agi balat. Enti kitai agi nitihka chara kitai sebedau tu, COVID-19 enda ulih punas sereta deka majak ngelekai.
“Pengelekai COVID-19 patut diketuka lalu kena ngetuka semua tu, nya patut bepun ari kitai semua,” ku iya nyemetak.
Ku Ting, perintah tauka opis bekuasa enda telabanka nya enti nadai kerejasama ari semua rayat.
“Nyadi peranak menua ke ibuh, kitai tau nyaup meri pemadah ngagai opis bekuasa.
“Pagi tu, aku bisi nerima kangau madahka di Sibu Jaya bisi orang babekiu ninting malam,” ku iya seraya madahka identiti meri pemadah nya deka dilalaika.