KUCHING: Gerempung Pengajar Sarawak (STU) ngarapka bala nembiak sekula ti ngambi peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM) 2021 dikemendarka nurun besekula pengudah kemisi Hari Raya Aidilfitri nyema maya nya udah tau nurun.
Presiden STU, Adam Prakash Abdullah madahka raban nembiak nya udah lenyau jam instruksional betemu mua enggau pengajar kenyau ari taun nyin tadi, berindik ari bejalaika program Ngajar enggau Belajar di Rumah.
“Kami nadai penanggul enggau berita ke pemadu baru ti dipadahka Menteri Kanan Pelajar Datuk Dr Radzi Jidin (bejalaika PdPR pengelama dua minggu pengudah kemisi Hari Raya Aidilfitri).
“Taja pia STU ngarap nembiak ke deka ngambi peresa SPM enggau STPM 2021 diberi peluang tama kelas nyema nadai penanggul.
“Sida mesti ke kelas ngulihka lalau enggau embing kena napi peresa,” ku iya lebuh dirandau kemari.
Adam madah, pengawa bejalaika PdPR lendang patut laban beratika gaya pengelekai COVID-19 di nengeri tu ke mega nyadi di sekula.
Taja pia ku iya, enti PdPR dipejalaika mungkur semua, STU pechaya batang penanggul ti bedau diputarka iya nya bungkur Internet enggau kurang gajet teknologi komunikasyen enggau pemadah (ICT) kelebih agi ti dikena nembiak di menua pesisir enggau kandang menua ulu entigis.
Kelimpah ari nya ku iya, bala nembiak enggau pengajar mesti nyendiaka belanja lebih kena meli data Internet laban PdPR endang dipejalaika nengah online.
Bala pengajar ku iya, deka bekereja lebih jam laban nganjung kereja latih enggau ‘nota’ ngagai bala nembiak kelebih agi di kandang menua ulu en tigis.
Tu deka begunaka ungkus pejalai enggau pengelikun pengajar ke mindah kin kitu ngintu nembiak sida, ku iya.
“Kami meri besai terima kasih ngagai Perintah Nengeri Sarawak laban udah ngepunka inisiatif nyendiaka bungkur Internet ba sekeda kenadang menua di Sarawak,” ku iya.
Bekaul kemisi Hari Raya Aidilfitri 2021 ti berengkah 7 nyentuk 16 Mei, Adam ngelalau bala pengajar ngambika seruran nitihka prosedur operasyen standard (SOP) ti ditetapka lalu anang ngelawa endur ti tau meri penusah ngagai diri empu, ruang bilik enggau nembiak sekula.
“STU minta semua pengajar ngelawa palan ke likun seerta nyaga pengelikun diri sekumbang kemisi Raya ila.
“Ungkup pengajar ke megai pengarap Islam, titihka jaku padah sentang chara pemindah ti dipadahka JPBNS (Komiti Mutarka Penusah Ngenyit Nengeri Sarawak) lalu seliahka ari ngelanggar nya.
“Belajar mih ari peneleba taun siti nyin tadi ngambika kitai ulih bejalaika pengawa kita pengudah kemisi Raya ila,” ku iya.
Kena Hari Satu, BERNAMA madahka Menteri Kanan Pelajar Datuk Dr Radzi Jidin madahka sesi belajar pengudah kemisi Hari Raya Aidilfitri deka dipejalaika nengah chara PdPR pengelama dua minggu, kena nganti sesi betemu mua di sekula.
Sesi belajar nya berengkah ari 16 nyentuk 27 Mei ungkup sekula kumpulan A (sekula di Johor, Kedah, Kelantan enggau Terengganu) lalu 17 nyentuk 28 Mei ungkup sekula kumpulan B (sekolah-sekolah di Perlis, Pulau Pinang, Perak, Selangor, Negeri Sembilan, Melaka, Pahang, Sabah, Sarawak, Kuala Lumpur, Labuan enggau Putrajaya).
Ku Radzi, pemutus nya digaga kena nyeliahka risiko rampit COVID-19 di sekula pengudah kemisi ngintu Aidilfitri ti deka berengkah kena 7 nyentuk 15 Mei ungkup sekula kumpulan A lalu 8 nyentuk 16 Mei ungkup sekula kumpulan B.
Ku iya, pengudah timpuh PdPR nya, bala nembiak sekula keka deka nampung kemisi penggal ke berengkah kena 28 Mei nyentuk 12 Jun ungkup sekula kumpulan A lalu 29 Mei nyentuk 13 Jun ungkup sekula kumpulan B.
“Tu utai baru di pelajarka kitai. Enti taun nyin tadi maya pengerami Aidilfitri sekula tutup kmaya nya, kita enda nemu baka ni data pengudah Raya.
“Kami irau ati kelebih agi ba sida ti deka mulaika diri ngagai buding laban dipelabaka bisi rampit ari luar, nya alai kami ngambi pemutus tu kena nagang pengelekai nya, laban pengudah pengerami nya, bala nembiak lama agi diau di rumah,” ku iya ba sebengkah aum media di Putrajaya.
Ku Radzi, bala nembiak ti diau ba buding sekula ke ari baruh KPM di seratai ngintu Hari Raya Aidilfitri lalu deka belajar chara PdPR dalam timpuh dua minggu pengudah kemisi nya.