MIRI: Parti Keadilan Rakyat (PKR) Baram minta perintah nengeri ngangakatka pelilih Baram ke diatu ari baruh pegai bagi menua Miri, nyadi bagi menua ke-13 di nengeri Sarawak.
Mandal Chairman PKR Sarawak ke mega Ketuai PKR Pampang Baram Roland Engan madah, kandang menua Baram besai amat lalu diatu udah bisi tiga pelilih menua ari baruh nya, nya alai udah datai ba maya iya status diangkatka ari pelilih menua ngagai bagi menua di nengeri tu.
“Kami deka ke Baram diangkat nyadi bagi ke-13 di Sarawak ke diatu ngembuan tiga pelilih menua iya nya Telang Usan, Marudi enggau Beluru,” ku iya ba aum media ditu, kemari.
Ku Roland, isu tu siti ari agenda ti dibantaika maya Aum Besai Ninting Taun (AGM) pampang nya ensana ke diatur nengah Google Meet nitihka Prosedur Operasyen Standard (SOP) COVID-19.
Isu bukai ke di andau maya aum nya, iya nya pematut perintah nengeri ngemeratka penanggul peranak di Baram baka isu nyadi peranak menua, pelajar, ngintu pengerai enggau klinik nyengkaum suntuk lutur, kurang pemansang infrastruktur enggau penanggul tanah tusur ketega aktiviti berimba kampung.
“Sekeda isu nyengkaum diambi tanah belama, pengawa berimba kampung ti majak ngerusak rampa menua enggau mayuh peranak Baram nadai kereja,” ku iya.
Ku iya, kaban parti nye mega berandauka sentang kuing politik PKR enggau agenda neruska reformasyen kelebih agi nyerumba pengawa bepilih nengeri (PRN) ke deka datai.
“PKR Baram sepenemu setuju nandu pinta kami ngambika Deklarasyen PBB Sentang Hak-hak Orang Asal (UNDRIP) disah sereta diaku dalam undang-undang nengeri tu.
“Kami mega deka ngemujurka agenda nadai agi pengawa berimba kampung; kimpin nyaga rampa menua enggau melindungi ubah gaya hari; minta ngaku garis entara semua genturung pendiau ti udah ditumbuhka sereta diaku aki ini bansa kami di Baram sereta neruska kimpin ‘anti suwa sementara,” ku iya.
PKR Baram mega deka ke pemansang infrastruktur kelebih agi bungkur jalai di selampur Baram dibelakin magang lalu ukai semina ngangkatmanah jalai kompeni kayu batang.
Ku Roland baru, PKR Sarawak deka berasai gaga amat ati enti parti politik penyakal ke bukai baka Parti Bumi Kenyalang (PBK) enggau Parti Sarawak Bersatu (PSB), enggau sama nyukung kimpin enggau chalun sida ba PRN ke deka datai laban sida deka mai reformasyen.
Sama bisi ba aum media nya, Kaban Parlimen Miri Dr. Teo Yu Kheng, Ketuai Pemadah PKR Sarawak Abun Sui Anyit enggau sekeda kaban komiti PKR Baram.