KUCHING: Peranak Sarawak dipinta ngerejista diri ngambi vaksinasyen COVID-19 nyentuk ke kebal ari penyakit nya ngambika semua orang ulih dijaga ari virus nya.
Menteri Kaunsil Kandang Menua enggau Pengawa Berumah Dato Sri Dr Sim Kui Hian madah, sepemanjai minggu nyin tadi, bisi 270,000 ari 900,000 rayat Sarawak dalam raban berisiko tinggi udah ngerejista ungkup renggat telah kedua Program Imunisasyen COVID-19.
“Kami begunaka semua orang enggau laban kami deka nuchuk vaksin ngagai semua orang ke tau, nyerumba bulan Ogos,” ku iya.
Iya ke mega penyanding penemu Komiti Mutar Penusah Ngenyit Nengeri Sarawak (JPBNS) madah munyi nya dalam akaun Facebook iya kena Hari Minggu nyin tadi.
Dr Sim meri jamin ke alai mayuh agi vaksin deka dibai tama ungkup vaksinasyen ke deka datai.
“Nya alai, kami besampi ngambika maya bulan Julai tauka Ogos ke deka datai, taja pan nadai mayuh vaksin maya nya iya, tang chukup ungkup dua juta peranak Sarawak ngambika dituchuk vaksin,” ku iya.
Berebak enggau nya, iya meri terima kasih ngagai Majlis Perbandaran Padawan (MPP) enggau ketuai raban bansa ketegal penyakah sida ngerejista raban bansa di menua nya ngambika dituchuk ba renggat kedua enggau renggat ketiga program vaksinasyen tu.
Ngagai ke bedau ngerijsta diri ba program vaksinasyen sida tau ngerejista diri ba website Komiti Khas Jaminan Akses Bekalan Vaksin (JKJAV) di https://www.vaksincovid.gov.my/, aplikasyen MySejahtera tauka ngerejista diri ba opis pelilih menua tauka ba opis residen ke semak enggau sida.