KUCHING: Parti Sa’Ati Rayat Sarawak (SUPP) pampang Engkilili benung ngambi singkang proaktif sereta meruan nyikap diri betapi enggau Pengawa Bepilih Nengeri Ke-12 (PRN12) ti deka datai.
Tu berindik ari Aum Komiti Kereja (JKK) SUPP raban sida ti diatur kemari ba opis Palan Servis SUPP Pampang Engkilili lalu chairman aum tu iya nya Kaban Kunsil Nengeri (ADUN) Simanggang Datuk Francis Harden Hollis.
“Ketegal SUPP iya nya komponen dalam Gabungan Perti Sarawak (GPS), nya alai nengah aum tu kitai udah berandauka bekaul pejalai aktiviti, pelin komiti kereja sereta pengawa nyikap diri betapi enggau PRN12.
“PRN12 mega deka diatur sebarang maya ari diatu. Timpuh Kunsil Nengeri (DUN) Sarawak deka tembu kena ujung bulan Jun 2021,” ku iya nengah siti penerang media kemari.
Taja pia, ku iya nyemetak, ketegal ti udah ditukuka ‘darurat’ tauka tasah politik nyentuk bulan Ogos nyin ila kena nagang pengelekai pandemik COVID-19 ti ngasuh isu PRN Sarawak terus nyadi tanda tanya ngagai semua rayat.
Iya nambah, gaya tasah politik tu enda ngemendarka PRN dipejalai kelimpah nya bulih pemendar ari Seri Paduka Baginda Yang Dipertuan Agong.
Entara pekara ti dikerandau iya nya ngatur enggau silik Program Transformasyen Menua Pesisir (RTP) sereta Projek Mit Menua Pesisir (MRP) ngagai rumah panjai, genturung pendiau, institusyen sereta sereta palan sembiang dalam sitak Engkilili.
“Rayat di sitak Engkilili udah nyadi raban ti dikemula ketegal politik ti enda nyangkung sida enggau nyukung pengari rayat ke ngena chap dachin lebuh nya.
“Lalu diatu nitihka singkang muakka kiba lalu nyakal perintah GPS.
“Gaya politik ti bisi di sitak Engkilili dikearap nyadi pun ngagai pekara ti baru iya nya sida ti megai perintah GPS aja ti ulih ngadaka pemansang.
“Nitihka pekara ti nyata penyakal enda ulih lalu nadau penatai pemisi deka nangkup peminta rayat dalam ngadaka pemansang,” ku iya nambah.
Lebuh program ngelawa nya mega Harden ti mega Menteri Muda Pengelantang Komuniti Sarawak bisi ngabas Bilik Operasyen PRN12 ungkup DUN N.33 Engkilili lalu ninga penerang bekaul pengawa nyikap diri ari Bong Nyuk Fah sentang chara ke deka digaga lalu nama ti patut dipejalaika maya nya ila.
Iya mega ngelalau semua kaban JK Kereja SUPP ngambika seruran bekerejasama ngemeratka parti kena ngerampas baru kerusi DUN Engkilili enggau chara demokrasi lalu semua kaban dipinta bebendarka agi matak pengerindu rayat.