KUCHING: Peranak Genturung Pendiau Sileng Dayak, Lundu dilalau ngambika enda irau ati lalu terus nitihka atur raban ti bekuasa semanjai timpuh Atur Nagang Pemindah Diteritka Agi (PKPD) di kandang menua nya.
Kaban Kunsil Nengeri (ADUN) Tanjong Datu, Datuk Amar Jamilah Anu madah, sida mega mesti terus diau di rumah diri empu kena ngemuntangka pengawa nyidi status pengerai sereta beperesa ti digaga raban ti bekuasa.
“Semua pengawa tu endang beguna kena mutuska rentayan COVID-19.
“Berindik ari nya, aku ngansak peranak Kampung Sileng Dayak meri kerejasama ti penuh enggau besabar lalu ngasika prosedur operasyen standard (SOP) ti ditetapka Opis Menteri Pengerai Malaysia (KKM),” ku iya.
Iya madah munyi nya lebuh ti ngelawa ke Bilik Operasyen PKPD Kampung Sileng Dayak, Lundu kena Hari Enam.
Kena Hari Empat (22 April), Komiti Mutarka Penusah Ngenyit Nengeri Sarawak (JPBNS) nengah penerang sida madahka Kampung Sileng Dayak di Lundu udah kena pentin PKPD ti berengkah dipejalai 23 April nyentukka 6 Mei 2021.
Dulu ari nya, Jamilah udah diberika penerang ari ejensi ti bekaul baka Opis Pengerai Pelilih Menua Lundu, Opis Pengelantang Pendiau Pelilih Menua Lundu, Indu Opis Polis Pelilih Menua Lundu sereta Opis Pemadah Pelilih Menua Lundu.
Iya pengudah nya nyuaka pemeri sengkabung idung enggau nyawa sereta pemakai ngagai raban terabai menua ba mua genturung pendiau nya.
Sama bisi dalam program tu iya nya Residen Bagi Menua Lundu, Gustian Durani.