KUCHING: Menteri Kandang Menua enggau Pengawa Berumah Dato Sri Dr Sim Kui Hian minta rayat nengeri tu lengkas berubat nyema sida bisi simptom COVID-19 taja agi biak lalu nadai komorbiditi.
Iya madah munyi nya laban ti ngenang bekaul enggau kes pemati ke-147 ketegal COVID-19 ti nyadi ba siku lelaki beumur 31 taun di Miri bedau lama ti udah.
Nitih ku iya niang tu bisi simptom (COVID-19) pengelama seminggu sebedau beperesa rT-PCR.
“Nya alai lebuh iya diperesa (pengudah rT-PCR ti madahka iya positif COVID-19), iya udah ba minggu ti kedua bisi simptom tu tauka sakit.
“Ungkup niang tu, timpuh ti chukup enda manah iya nya ketegal, laun berubat. Ungkup ruang bilik iya mega, sida endang betapi sereta ngembuan risiko ti tinggi kena rampit. Ungkup di palan endur iya gawa sereta bala bakih mega mayuh ti betapi lalu dalam penusah tu.
“Ungkup komuniti ti besemak enggau iya, mayuh ti udah berisiko kena penyakit tu taja sida enda nemu. Nyema bisi komuniti ti nemu, sida lalu nyaga diri, penyereta komuniti sereta ngemeranka chara kena nyeliahka COVID-19, kitai ukai semina lenyau siku raban nembiak Sarawak tang mega tu ngeruga sebarang kluster ti ngaul sida sebilik enggau bala bakih ti sama endur gawa.
Dr Sim ti mega penyanding penemu Komiti Mutarka Penusah Ngenyit Nengeri Sarawak (JPBNS) madah munyi nya dalam penerang di akaun Facebook kena malam Hari Enam (24 April 2021).
Dalam utai ti dianjung iya nya, Dr Sim mega madahka umur orang ti midang ketegal COVID-19 tu diatu majak biak.
“Nyentukka 40 peratus ari kluster pesakit (ti bisi simptom) iya nya sida ti agi biak,” ku iya.
JPBNS nengah penerang kena Hari Lima madahka kes pemati ke-147 ketegal COVID-19 tu ngaul siku lelaki beumur 31 taun ti udah dipasuk ke Sepital Miri pengudah peresa rT-PCR digaga lalu kena 7 April ditemu positif COVID-19.
Iya berengkah bisi simptom tu iya nya kena rampit ba sistem enseput (respiratori) seminggu pengudah dipasuk ngagai sepital.
Tikas pengerai iya mega majak enda manah lalu midang kena 21 April 2021. Nitih ku JPBNS, niang tu mega nadai sejarah komorbiditi.