Anda di sini

Nanta: Perintah agi ngenanka kuota minyak sumai besubsidi

Advertisement

KUCHING: Perintah agi ngenanka kuota minyak sumai besubsidi sepenyampau 60,000 tan metrik ninting bulan nyengkaum ba taun 2020 enggau 2021.

Menteri Dagang Dalam Nengeri enggau Pekara Penguna (KPDNHEP), Dato Sri Alexander Nanta Linggi madah, pemutus nya ditetapka taja pan rega RBD Palm Oilen niki sepenyampau 83 peratus ba taun 2021 ari taun sebedau nya.

“KPDNHEP deka nerangka ke alai perintah agi ngenanka kuota minyak sumai besubsidi sepenyampau 60,000 tan metrik ninting bulan nyengkaum ba taun 2020 enggau 2021, taja pan rega RBD Plam Olien udah nambah sepenyampau 83 peratus ngagai RM4,122 per tan metrik ba taun 2021 dibandingka enggau RM2,255 per tan metrik ba taun 2020.

“Tu sama reti enggau 60 juta paket polibeg 1kg iya nya 1.5kg diungkupka ngagai tetiap iku rayat Malaysia nyengkaum Wilayah Sarawak enggau Wilayah Sabah, lalu perintah mega nambahka ungkup belanja ketegal komitmen perintah deka mekalka 60,000 tan metrik tiap taun taja pan rega RBD Palm Olien udah niki,” ku iya.

Nanta nerangka pekara nya nengah penerang berita kemari, kena iya nimbal penerang ti madah suntuk bekal minyak sumai besubsidi di Wilayah Sarawak baka ti diripotka ba berita sebedau tu.

Ku Nanta, nyema rega RBD Palm Olien majak niki, perintah melaba ungkus ungkup skim tu deka majak nambah, ari RM400 juta ngagai RM1.8 bilion.

“Berindik ari pekara nya, pemutus perintah ti ngenanka kuota dalam program COSS ngayanka komitmen perintah ti tinggi deka ngurangka ungkus pengidup sereta nyaga pengelantang pendiau rayat,” ku iya.

Nitih ku iya, Bagi Penerit Adat KPDNHEP seruran bejalaika audit enggau komprehensif dikena nentuka tetiap pemansut minyak sumai besubsidi ulih diterima ba tetiap rentayan penyadung.

Asil ari audit enggau atur ke terit dikena napi ‘ketirisan’ nyadung minyak sumai besubsidi, ku iya, bisi 318 kes udah diasilka ba serata nengeri bekaul enggau minyak bepanduk kenyau ari taun 2016 ngagai Mac 2021.

Dalam timpuh nya, bisi empat buah kompeni mungkus minyak sumai udah ditinggang atur nengah chara nginsil kuota ke udah diberi ngagai sida sebedau tu, ku iya.

“Bepelasarka rikod, bisi 11 pemungkus minyak sumai besubsidi ari baruh COSS di Sarawak enggau kuota sepenyampau 3,067 metrik tan.

“Nitihka rikod ke diperesa bisi 25 sebana bekaul enggau minyak bepanduk ba Wilayah Sarawak ba taun 2020 ngagai 31 Mac 2021.

“Kelimpah ari nya, bisi 4,221 pengawa meresa udah dipejalaika ba premis ti nyual minyak bepanduk nyentuk 12 April 2021, sereta ngasilka sepenyampau lapan kes semanjai taun 2021 tu,” ku iya.

Nitihka ripot berita apin lama, madahka suntuk minyak sumai besubsidi bepun ari ulah kompeni mungkus nya ti enda rurus ati ba pengawa mekalka minyak sumai besubsidi nitihka penyampau ti udah ditetapka patut disadung ba pasar besai enggau kedai renchit.

Ripot nya mega minta opis menteri tu ngenyakahka agi pengawa matau enggau penerit adat ba aktiviti mungkus minyak sumai besubsidi, sereta nentuka ungkup belanja subsidi sepenyampau RM400 juta ba taun 2021 dipelanja enggau chara ti manah.

Advertisement