KUCHING: Sarawak kemari ngerikodka kes baru ninting hari COVID-19 ti pemadu tinggi, iya nya 607 kes enggau empat kes pemati baru.
Komiti Mutarka Penusah Ngenyit Nengeri Sarawak (JPBNS), madahka Pelilih Menua Bintulu majak ngerikod pemadu mayuh kes positif kemari iya nya 130 kes, ditangkanka Kuching enggau Sibu ti sama ngerikod 106 kes.
Nambahka nya Pelilih Menua Mukah (52), Miri (49), Kapit (33), Meradong (29), Saratok (23), Samarahan (14), Sarikei (14), Betong (8), Bukit Mabong (8), Selangau (8), Subis (8), Dalat (5), Kanowit (3), Matu (3), Julau (2), Serian (2), Sri Aman (2), Asajaya (1) enggau Beluru (1) ti ngujungka penyampau semua kes COVID-19 di Sarawak nambah nyadi 20,959 kes, ku JPBNS.
Nitihku JPBNS enggau penambah empat kes pemati ketegal rampit COVID-19 kemari ngujungka semua penyampau kes pemati ketegal rampit virus tu di Sarawak nambah nyadi 128 iku.
“Penyampau kes sehari tu (kemari) iya nya pemadu mayuh diripotka di Sarawak. Tu ketegal bisi kes diripotka ba Palan Pematih Polis Sarawak (PULAPOL), iya nya 61 kes. Sida tu diengkah dalam palan pematih sereta dijaga,” ku JPBNS nengah penerang berita, kemari.
Bekaul enggau kes pemati ku JPBNS, empat kes baru nya nyengkaum dua iku indu enggau dua iku lelaki peranak menua Sarawak.
Kes pemati ke-125 bekaul enggau kes ke-19,731 bekaul enggau siku indu peranak menua (Sarawak) beumur 36 taun ti udah dipasukka ba Sepital Miri laban ti deka bebuntas elektif.
“Kes ditemu positif COVID-19 kena 10 April 2021 nengah peresa rT-PCR. Tikas pengerai kes majak enda manah sereta ditukuka udah nadai kena 10 April 2021. Kes tu bisi ko-morbid penyakit systemic lupus erythematosus,” ku JPBNS.
Kes pemati kes-126 bekaul enggau kes ke-16,377 siku indu peranak menua (Sarawak) beumur 67 taun, ti dipasukka ba Sepital Sibu laban betapi penanggul bedarah dalam perut.
Kes-126 diperesa ngena rT-PCR lalu ditemu positif COVID-19 kena 31 Mac 2021 sereta tikas pengerai kes majak enda manah enggau ditukuka udah nadai kena 12 April 2021, ku JPBNS.
Nitihku JPBNS mega, kes-126 bisi ko-morbid penyakit darah tinggi, kemi manis, penyakit Hepatitis enggau penyakit tukul sengayuh (ikas ke penudi).
Nambahka nya kes pemati ke-127 bekaul enggau kes ke-10,032 siku lelaki peranak menua (Sarawak) beumur 67 taun ti dipasukka ba Sepital Sibu laban sendat seput.
“Kes bisi tanda tabin, batuk enggau lemi tubuh beberapa hari ke udah. Beperesa ngena rT-PCR sereta ditemu positif COVID-19 kena 2 Mac 2021.
“Tikas pengerai kes majak enda manah sereta ditukuka udah nadai kena 12 April 2021. Kes tu bisi ko-morbid penyakit darah tinggi, kemi manis, dislipidemia, penyakit tungkul ati enggau penyakit tungkul sengayuh kronik.
“Baka ke dipadah kes tu (ke-127) ari Kluster Kiba,” ku JPBNS.
Kelimpah ari nya, kes pemati ke-128 bekaul enggau kes ke-18,416 siku lelaki peranak menua (Sarawak) beumur 42 taun ti dipesukka ba Sepital Sibu laban sendat seput.
“Kes mega bisi tanda batuk enggau enda masuk makai beberapa hari ke udah. Beperesa ngena rT-PCR sereta ditemu positif COVID-19 kena 16 April 2021.
“Tikas pengerai kes majak enda manah sereta ditukuka udah nadai kena 12 April 2021. Kes tu bisi ko-morbid penyakit darah tinggi enggau strok,” ku JPBNS seraya meri penyinu ati ngagai semua orang ke sebilik enggau kes pemati.
Kelimpah ari nya JPBNS kemari ngeripotka 189 kes baru gerai sereta dikemendarka pansut ari Sepital Sarikei enggau PKRC Sepital Sarikei (66), Sepital Bintulu (45), Sepital Sibu enggau PKRC Sepital Sibu (31), Sepital Miri (24), Sepital Besai Sarawak (9), PKRC Sepital Kapit (7), PKRC Serian (4), PKRC Lawas (1), PKRC Mukah (1) enggau PKRC Betong (1).
Tu ngujungka penyampau semua kes positif COVID-19 udah gerai sereta dikemendarka pansut ari sepitak naka kemari bisi 16,639 iku tauka 79.39 peratus ari penyampau semua kes COVID-19dia Sarawak.
Kemari mega bisi 607 PUI baru diripotka sereta nadai PUI nganti pemutus peresa makmal.