KUCHING: Gerald Rentap Jabu ngenadaika penemu ti madahka Parti Pribumi Bersatu Malaysia (BERSATU) engka ngena tikit Gabungan Parti Sarawak (GPS), nyema deka bediri minta pilih ba Pengawa Bepilih Nengeri (PRN) tu ila.
Rentap ke mega Ketuai Nembiak Parti Pesaka Bumiputera Bersatu (PBB) madah ngagai The Borneo Post kemari, Sapit Ketuai Nembiak PBB ke mega Kaban Kunsil Nengeri (ADUN) Tupong, Fazzrudin Abdul Rahman nadai kala berandauka pekara nya enggau Chairman Penggerak Komuniti Negara (PKN) Sarawak, Nurhanim Hanna Mohksen.
Nya alai, utai ti dipadahka Kaban Kaunsil Tetinggi BERSATU, Datuk Zuraida Kamaruddin bekaul penerang Nurhanim nya enda betul.
“Nurhanim nadai kala berandauka isu politik enggau Yang Berhormat Fazzrudin, tang semina berandauka penanggul mensia mayuh baka ngemanah jalai alun, bantu pengelantang pendiau enggau pekara bukai,” ku Rentap.
Apin lama udah, maya ngelancharka PKN ditu, Zuraida madah ngagai media ke alai BERSATU engka ngena tikit GPS nudukka chalun sida nyema deka bediri minta pilih, lalu Nurhanim madahka iya udah berandau enggau Fazzrudin ngaluska sekeda isu kena ngemudahka pekara nya.
Berebak enggau nya, Rentap madahka GPS deka bediri minta pilih ba semua 82 kerusi DUN.
GPS diarika PBB, Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP).
“PPBM (tauka Bersatu), ukai kaban GPS.
“Menteri Besai Tan Sri Muhyiddin Yassin udah nyerahka ngagai Kepala Menteri Datuk Patinggi Abang Johari Tun Openg nengah kapasiti iya nyadi Chairman GPS, ngaga pemutus sentang kerusi ke deka alai bediri minta pilih nyengkaum chalun.
“Anang datai ke Sarawak lalu semina ngaga peminta. Manah agi iya (Zuraida) dulu meretika peneka rayat sereta ngaga mayuh agi balai bomba, skim rumah rayat enggau agih nelanja ungkup opis kaunsil kandang menua ngambika ‘region’ Sarawak sama penuduk enggau wilayah Semenanjung Malaysia,” ku iya nyemetak.