KUCHING: Raban pengawa bepilih Parti Pesaka Bersatu (PBB) Pampang Pantai Damai udah sedia betapi enggau Pengawa Bepilih Nengeri Ke-12 (PRN12), ku Mandal Presiden PBB Datuk Dr Abdul Rahman Junaidi.
Dr Abdul Rahman ti mega Menteri Muda Pekara Islam enggau Dewan Bandaraya Kuching Utara (DBKU) madah, semua pengawa nyikap diri dipejalaika enggau manah asil kerejasama rat raban pengawa bepilih pampang sereta ranting.
Nitih ku iya, pengawa nyikap diri tumu iya nya chara ti pemadu manah ngambika semua penyarut tauka penanggul maya timpuh nyau deka semak ulih diseliahka.
“Kitai seruran besedia lalu semina nganti gendang ditabuh.
“Taja pia, kitai agi nyikap diri ari sukut mental enggau fizikal,” ku iya maya Pengerami Makai Lemai Begulai enggau Eksko PBB Pampang Pantai Damai ditu, bedau lama ti udah.
Dr Abdul Rahman nerang, raban pengawa bepilih parti nya deka seruran chakah bejalaika pengawa ngambika tetiap pelin bejalai enggau manah lalu nentuka pemutus ti pemadu manah ulih dijapai.
Iya mega beterima kasih ngagai eksko PBB Pampang Pantai Damai ti udah bebendar bejalaika pengawa ungkup parti.
“Tetiap pengawa ti digaga kitai enggau bebendar begunaka pengering mental enggau fizikal ngambika bulih pemutus ti positif,” ku iya.
Sama bisi datai Sapit Ketuai PBB Pampang Pantai Damai Drahman Jaladin, Sapit Ketuai Raban Orang Idnu PBB Pampang Pantai Damai Dayang Nora Awang Sabudin enggau Ketuai Raban Nembiak PBB Pampang Pantai Damai Sebeki Jen.