Anda di sini

Dua palan di Betong dikemansang nyadi Taman Agro

Advertisement
 Uggah enggau Razi sereta bala bukai maya pengerami nasih tanah projek Lumba enggau Main Debak.
BEJADI: Uggah enggau Razi sereta bala bukai maya pengerami nasih tanah projek Lumba enggau Main Debak.

DEBAK: Perintah nengeri udah nentuka dua palan di bagi menua Betong ti deka dikemansangka nyadi Taman Agro.

Sapit Kepala Menteri Datuk Amar Douglas Uggah Embas madah, entara nya di Lubok Tamang di Saribas lalu siti agi enda jauh enggau projek perambu padang bilun STOLport di Bebuling, Spaoh.

Iya ke mega Menteri Betanam Betupi Moden, Tanah Adat enggau Pemansang Kandang Menua madahka taman agro Lubok Tamang ti bisi kandang endur enggau pemesai urung 2,000 hektar.

“Opis Parit enggau Entali Ai (DID) udah mutarka pelin besai sistem nya.

Lalu pia mega taman agro ke siti agi iya nya enda jauh ari STOLport Bebuling di Spaoh lalu nya bisi kandang endur pemesai 1,500 hektar lalu ditambah enggau 300 hektar ungkup pengawa betanam betupi moden,” ku iya madah ngagai pengarang berita pengudah bejadika pengawa nasih tanah Komplek Lumba enggau Main Debak ditu, kemari.

Ku iya, perintah udah ngemendarka RM8.9 juta ungkup kompleks ti dipelaba tembu setaun ari diatu lalu nya digaga di kandang menua pemesai urung empat hektar lalu deka bisi trek endur belanda, padang main bol sereta perengkaguna ke bukai.

Bejaku silik bekaul taman agro nya, iya madahka perintah deka berundingka model kompeni besai dalam ngemansangka taman nya, kena nentuka semua asil betanam nya ulih dijual.

“Model tu iya nya ke alai bisi kompeni ti bisi peneleba berapa taun dalam pengawa nanam komoditi kena mantu dalam ngemansangka taman nya.

“Kebuah pia kompeni baka tu ngembuan rentayan dagang ti chukup manah. Tu iya nya siti penguji ti pemadu besai ngagai kitai.

“Kelimpah ari nya kompeni bansa tu mega bisi perambu standard pemakai menua ti ngimport ke endang terit. Nyangka kompeni ke baru enda ngembuan pemisi tu,” ku iya.

Ku iya madah, kededua taman agro ti ditemu tu iya nya sebagi ari kandang endur Bakul Pemakai Betong ti nyengkaum kandang menua ari Betong nyentuk ke Bagi Menua Mukah.

Ba taman agro nya, Uggah madahka raban pekebun enggau orang dagang tani ti bisi pengerindu ulih minta nyuwa plot ungkup aktiviti betanam betupi sida.

Ku iya, perintah deka nyendiaka semua infrastruktur ti diguna nyengkaum sistem teknologi pemadah (IT) ungkup pemaik semua.

“Kami ngarapka bala pekebun di kededua kandang menua tu, sida meri kerejasama penuh lalu besedia ngena chara betanam betupi moden ke ulih nyaup sida nyungkak penatai pemisi,” ku iya.

Sama bisi ba pengerami nya Kaban Parlimen Betong Datuk Robert Lawson Chuat, Kaban Kunsil Nengeri Saribas Mohd Razi Sitam, sekretari politik Kepala Menteri Dr Richard Rapu sereta Residen Betong Friday Belik.

Advertisement