TATAU: Menteri Muda ba Opis Kepala Menteri (Undang-Undang enggau Adat Bumiputera) ti mega Kaban Kunsil Nengeri (ADUN) Kakus Datuk John Sikie Tayai ngelalau peranak kelebih agi ti diau ba Tatau ngambika enda ke Bintulu maya tu nyema nadai pekara ti berat sereta patut taja dalam zon ti sama.
“Aku seruran nitihka ripot kes positif COVID-19 ke alai diatu mayuh kes ti majak nyadi di Bintulu. Kena 8 April aja Bintulu ngerikodka 70 kes iya nya ti pemadu tinggi di nengeri Sarawak,” ku iya dalam penerang media ditu kemari.
Ku iya madah, ungkup sida ti diau di Bintulu tauka di mengeri mega enda dikemendar ngambika pulai ke rumah panjai maya tu nyema nadai kebuah ti berat.
“Ketuai Komuniti enggau Ketuai Bansa (KMKK) patut matau sereta ngeripotka ngagai opis pelilih menua nyema bisi peranak ti ngatur program rama baka rami melah pinang enggau pengawa nyengai pemati,” ku iya nambah.
Ku iya, taja pengerami rama dikemendar di kandang endur zon Gadung swereta Kuning nitihka prosedur operasyen standard (SOP) ti ditetapka baka enda lebih ari 50 peratus penatai, tang peranak mesti nyeliahka ari begempuru bebala mayuh baka ngatur program bepanggang, pengerami ngintu hari pengada enggau ke bukai.
“Jaga pemeresi ruang bilik, suahka agi nuchi jari lalu kena ‘sanitizer’ jari lalu titihka semua SOP ke ditetapka. Keluar rumah nyema patut ambika chunto meli barang guna ninting hari tang mesti nitihka SOP,” ku iya.