BINTULU: Polis DiRaja Malaysia (PDRM) ngatur pengawa meresa ti terit ba Padang Bilun Bintulu kena nentuka barang sapa ti tama ngena penerebai domestik udah ngatur pengawa peresa COVID-19 (rT-PCR) sebedau tama ke Bintulu.
Ketuai Polis Pelilih Menua Bintulu Superitenden Zulkipli Suhaili dalam penerang iya ditu madahka, pengawa meresa ti digaga ba Padang Bilun Bintulu nya ungkup penerebai domestik ngagai orang tambang dalam nentuka sida udah ngaga peresa rT-PCR tiga hari sebedau tama ke Bintulu lalu bisi ngembuan permit polis.
Pengawa meresa nya ukai semina digaga ba padang bilun di bintulu tang mega pengawa ngempang jalai alun ba garis entara pelilih menua jalai tama ke Bintulu dalam nentuka individu tauka orang luar ti tama ke Bintulu nadai kena rampit COVID-19 lalu mega ngurangka pengelekai kes igi penyakit nya di Bintulu sereta nengeri tu ulih diatur enggau manah.
Dalam aum media kena 31 Mac ti udah, Chairman Komiti Mutarka Penusah Ngenyit Bagi Menua Bintulu ti mega Residen Bagi Menua Bintulu Jack Aman madahka, berindik ari mayuh kes pengelekai COVID-19 ti nyadi di Bintulu tu bepun ari pemindah individu ari luar bagi menua tu lalu nya ti ngerampit komuniti sereta ngujungka pengelekai ba palan gawa, nya alai JPBB Bintulu mutuska mesti ngaga peresa COVID-19 (rT-PCR) sebedau tama ke Zon Bintulu berengkah 5 nyentuk 18 April tu.
Ku iya, JPBB Bintulu udah merambu ngambika semua orang ti deka tama ke Zon Bintulu mesti ngaga peresa COVID-19 dalam timpuh tiga hari sebedau ngepunka pejalai.
Ku iya mega, pemutus peresa nya mega mesti bnyadi dokumen sukung lebuh ti minta permit polis kena mansa entara zon.
“Nyema nadai pemutus peresa COVID-19, polis bisi hak enda ngemendarka permit pemindah nya.
“Individu ti ditemu nadai dokumen pemutus peresa COVID-19 nya ditagang tama ke bagi menua Bintulu tauka deka dipasukka ngagai palan kuarantin pengelama 14 hari lalu semua ungkus kuarantin sereta peresa deka dibayar individu nya empu,” ku iya nyemetak.
Pia mega ku iya, taja pia atur tu ukai ungkup sida ti tama ke Bintulu ketegal bisi penusah ngenyit tang dokumen sukung mesti dipegulaika ambika chunto surat semaya betemu enggau lutur di seoital tauka datai ngagai penusah rabat.
Pia mega ngagai individu ari baruh kategori servis berat ti suah kekelut ke Bintulu deka ditenduka iya nya pemutus peresa COVID-19 semina sah dalam timpuh dua minggu.
“Ungkup sida ti pansut ari Bintulu lalu udah nya tama baru ke Bintulu mega mesti ngaga peresa COVID-19 ti nyadi dokumen sukung begulai enggau permit polis kena tama ke zon Bintulu,” ku iya.
Dulu ari nya, ku iya, pemutus berat aum JPBB Bintulu tu digaga bepelasarka pansik ari Opis Pengerai Bagi Menua Bintulu lalu ari buah penemu semua kaban komiti kena nagang pengelekai COVID-19 di Bintulu.