KUCHING: Sarawak kemari ditukuka bisi dua agi kluster baru COVID-19 iya nya Kluster Jalai Kapitan, Marudi enggau Kluster Disso, Saratok.
Sekretariat Komiti Mutarka Penusah Ngenyit Nengeri Sarawak (JPBNS) madahka nya nyadika penyampau kluster COVID-19 aktif ba nengeri tu naka kemari bisi 44 kluster.
"Sehari tu (Kemari), Opis Pengerai Nengeri Sarawak (JKNS) udah ngenukuka dua agi kluster baru iya nya Kluster Jalan Kapitan, Marudi enggau Kluster Disso, Saratok.
"Lalu penyampau kes baru ti dirikotka dalam Kluster Jalan Kapitan, Meradong bisi siti kes enggau Kluster Disso, Saratok mega bisi siti kes," ku JPBNS, nengah penerang berita kemari.
Nitihku JPBNS kemari ari penyampau semua 44 kluster COVID-19 ke agi aktif ba nengeri tu, bisi semilan kluster ngerikodka nambah kes enggau 35 kluster nadai nambah kes.
Entara semilan kluster ke bisi nambah kes baru iya nya Kluster Emperoh Jambu, Kuching (tiga kes); Kluster Lorong Desa Senadin, Miri (siti kes); Kluster Jalan Kingsway, Miri (empat kes); Kluster Bulatan Aman, Sibu (11 kes); Kluster Jalan Baji, Sarikei (17 kes); Kluster Tembok Sri Aman, Sri Aman (enam kes) ; Kluster Sungai Kawi, Meradong (tiga kes) enggau kelimpah ari Kluster Jalan Kapitan, Marudi enggau Kluster Disso, Saratok ti sama ngerikodka siti kes baru.
Nambahka nya nitihka ripot JPBNS, kemari penyampau pelilih menua ba status Mirah bisi 12 pelilih menua , Oren (4), Kuning (19) enggau Gadung bisi lima pelilih menua iya nya Telang Usan, Lundu, Pusa, Simunjan enggau Kabong.
Kelimpah ari nya, JPBNS madah berengkah 9 April 2021 lumur telefon betanya bekaul enggau COVID-19 komiti (JPBNS) iya nya 082-443 991.