KUCHING: Sapit Kepala Menteri, Tan Sri Datuk Amar James Jemut Masing minta Opis Pengerejista Bansa (JPN) nganjung raban mindah kin kitu opis nya ke Long Singut mutarka isu orang ke ukai peranak menua ba endur nya.
Ku iya, tebal agi peranak serak kedua enggau ketiga ba Long Singut bedau nyadi peranak menua.
"Aku mantu peranak Long Singut ke nadai kad pengelala enggau ke bedau nyadi peranak menua. Sida nya peranak serak kedua enggau ketiga ba Long Singut," ku iya ba siti penerang kemari pengudah nemuai ke Long Singut kena Hari Satu (5 April) tu tadi.
Nitihku Masing ti mega Kaban Kunsil Nengeri Baleh madah, bisi 729 iku sida nya ti tebal agi bedau nyadi peranak menua lalu sida nya orang ke pindah ari Kalimantan ba taun 60-an.
Masing madahka anak ba menua nya enda ulih nampung pelajar ngagai Form 5 taja pan sida bulih pemutus ke nyulut.
Ku iya, orang biak enda ulih ngiga kereja laban nadai dokumen penerang diri.
"Perintah Malaysia patut mutarka pekara ke mar diadu bekaul enggau bedau nyadi peranak menua. JPN patut enggau lengkas nganjung raban minda kin kitu sida ke Long Singut ," ku iya ti mega Presiden Parti Rakyat Sarawak (PRS).
Masing ngelalau, perintah ti bekuasa tau dituduh enda beratka penanggul rayat nyema isu nya enda diputarka lalu nya alai pekara nya patut diputarka enggau lengkas.
Nyempulang iya, Pemesai Pelilih Menua Bukit Mabong Douglas Pungga.