KUCHING: Datuk Amar Awang Tengah Ali Hasan madahka diri bejaku enggau polis berindik ari video ti dikerembaika bedau lama udah, ke alai iya dipeda nadai ngena sengkabung idung enggau mulut lebuh ke nemuai ngagai Pelilih Matu di Mukah kena 31 Mac tu tadi.
Sapit Kepala Menteri Sarawak nya madah, maya nya iya udah ngelawa bansal alai bejual ba endur nya, lalu udah muka sengkabung idung enggau mulut ketegal ensepi pemakai enggau ai irup ti dijual dia.
Ku iya, maya nya mega iya berumban deka pulai ari Matu.
“Aku udah bejaku enggau polis ensana lalu aku aku dipadahka deka diberi sida kompaun.Aku ngaku penyalah aku.
“Aku mega enda berasai (enda ngena sengkabung idung enggau mulut ) lebuh pemesai madahka kami mesti pulai, nya alai aku pan berumban. Enti aku dikompaun,aku tetap mayar kompaun nya,” ku iya lebuh ke bejaku ba pengerami gempuru khas Kaunsil Pemansang Industri Kayu Sarawak (Pusaka) ditu, kemari.
Bedau lama udah, video bisi dikerembaika ti mandangka Awang Tengah maya nya benung begulai enggau orang ke bejual ba palan bejual,ke alai iya dipeda enda ngena sengkabung idung enggau mulut.
Berebak enggau nya, Awang Tengah madahka industri kayu diatu napi mayuh macham pemar kelebih agi maya ekonomi global ti enda meruan enggau geopolitik ke diatu nyengkaum besemekih enggau menua pengeluar bukai baka Indonesia,Vietnam enggau China.
Ku iya ba renggat domestik, bisi kurang penyampau pemansut ari kampung asal enggau penambah pemansut ba produk keterubah, udah ngujungka daya besemekih ba industri kayu menua tu empu.
“Eksport papan lapis Sarawak ke Jepun mega bisi nurun ari RM2.11 bilion ba taun 2019 ngagai RM1.97 bilion ba taun 2020. Nya ngujungka penuduk kitai diambi Indonesia,ti nyadi pemekal papan lapis lumur satu ke Jepun,” ku iya. — Bernama