KUCHING: Ketuai Nembiak Parti Rakyat Sarawak (PRS), Datuk Snowdan Lawan enda begilik penemu ari penerang iya ke sebedau tu, ti madahka semina chalun ari parti nya aja tau bediri minta pilih ba sitak Parlimen Julau maya pengawa Bepilih Besai (PRU) ila.
Snowdan lebuh dirandau pengudah bejadi Aum Besai Belia 2021 ba Dewan Bahasa dan Pustaka Pampang Sarawak kemari madah, sitak Parlimen Julau nya sitak asal PRS.
“Nya kebuah sitak tu (Julau) deka diarika chalun ari PRS,” ku iya ti mega Kaban Kunsil Nengeri Balai Ringin.
Ditanya sekalika PRS bisi chalun ke tau dikearapka ulih menang ba Julau, Snowdan madah, bisi chalun ti tau dikearapka ulih menang tang deka kelala silik agi.
“Aku siku ari komiti milih kelimpah ari Tan Sri James Jemut Masing, Datuk Seri Doris Sophia Brodie, Datuk Janang Bungsu enggau Datuk Joseph Salang Gandum.
“Kami merambu deka nganjung nama tu ngagai Kepala Menteri lalu udah nya bepanggai ba Kepala Menteri meda enggau ngemendarka nama ti dichalunka nya,” ku iya.
Terang Snowdan, parti deka ngatur aum Kaunsil Tetinggi sereta deka berandauka pekara tu sebedau dikenataika ngagai Kepala Menteri.
Ditanya penemu iya ti nyadi Ketuai Nembiak PRS, nyema Ex-chairman Parti Keadilan Rakyat (PKR) Sarawak, Larry Sng bisi ati deka nyemilik baru PRS, Snowdan madah, barang sapa tau minta nyadi kaban PRS.
Taja pia ku iya bebendar madah, nya bepanggai ba parti ngaga pemutus.
“Kami deka mai nya ngagai MKT (Kaunsil Kereja Tetinggi) sekalika setuju tauka enda. Enda tau enda disetuju semua ngambika diperundingka. Ukai pemutus siku tauka dua iku,” ku iya.
Taja pia ku Snowdan, naka ke diatu parti nadai nerima peminta ari Ex- ketuai PKR nya ti mega penyandang sitak Parlimen Julau, minta nyemilik parti nya baru.