Anda di sini

PSB udah nyendiaka 200 lampu jalai kuasa solar di menua pesisir, ku Wong

Advertisement
 Wong (tiga kanan) mantu pengawa masang lampujalai solar di kandang menua Paradom.
PERENGKAGUNA PERANAK: Wong (tiga kanan) mantu pengawa masang lampujalai solar di kandang menua Paradom.

SIBU: Parti Sarawak Bersatu (PSB) deka masang enggau naka pemayuh ti ulih lampu jalai ti ngena kuasa solar di kandang endur ti strategik ba menua pesisir.

Presiden PSB Dato Sri Wong Soon Koh madah, nyadika pun bisi 200 unit lampu jalai deka disediaka kelebih agi ba jalai besai, simpang jalai sereta kandang endur ti jauh.

“Lebuh ngagihka bantu pemakai ngagai peranak ti tekeruga laban pandemik COVID-19 bedau lama, aku udah nerima timbal ari peranak di kandang menua pesisir ti begunaka lampu jalai di kandang endur sida.

“Kebuah ti keterubah iya nya laban palan ti petang suah bisi kes bebadi jalai alun kelebih agi ti ngaul sida ke mai mutosikal.

“Kedua suah nyadi kes churi ti ngaul penyalah nyerungkai rumah sereta mega ba kebun ti diempu peranak ditu,” ku iya pengudah bejadika pengawa masang lampu jalai solar ba Jalai Paradom, kemari.

Iya ti mega Kaban Kunsil Nengeri (ADUN) Bawang Assan nya madahka, kelimpah ari kandang endur Paradom, lampu jalai ti ngena kuasa 400 watt nya mega dipasang di kandang menua Sungai Bidut, Engkilo, Sungai Sadit enggau ke bukai.

“Tu iya nya trend ke alai selampur dunya diatu udah ngena teknologi kemerah rampa menua iya nya kuasa solar,” ku iya nerang.

Ku Wong madah, pengawa nyendiaka perengkaguna tu mega kena nambahka perengkaguna ke udah bisi ti disediaka perintah.

Raban bekuasa kandang menua (PBT) ku iya, enda ulih mantu nyendiaka lampu jalai ti diguna peranak laban agih belanja ti enda umbas.

“Berindik ari nya, PSB datai enggau nyendiaka lampu jalai di kandang menua ke strategik ungkup perengkaguna peranak di kandang menua pesisir,” ku iya nambah.

Advertisement