Anda di sini

Nembiak Sarawak bisi kualiti ti chukup manah: Snowdan

Advertisement
 Snowdan nerima tepa Kamus Dewan Perdana ti disuaka Haliman (kiba) kelai terima kasih udah bejadi program Aum Besai Belia 2021, seraya diperatika Awangku Merali (kanan), kemari. — Gambar Chimon Upon
TERIMA KASIH: Snowdan nerima tepa Kamus Dewan Perdana ti disuaka Haliman (kiba) kelai terima kasih udah bejadi program Aum Besai Belia 2021, seraya diperatika Awangku Merali (kanan), kemari. — Gambar Chimon Upon

KUCHING: Nembiak Sarawak bisi kualiti ti chukup manah enda ngira sekalika ba renggat nengeri, menua tauka antarabansa.

Menteri Muda Nembiak,Lumba enggau Main Sarawak,Datuk Snowdan Lawan madahka nembiak Sarawak nyulut dalam mayuh bengkah bidang ukai semina dalam pelajar aja.

Apin lama ku iya, diripotka dua iku nembiak universiti ari Sarawak diangkatka nyadi nembiak ti pemadu nyulut ba Universiti Kebangsaan Malaysia (UKM).

“Aku enggau peluang tu meri puji ngagai Ayuna Yusoff enggau Claundya Luncha Julin laban ti udah nyulut sereta nerima Anugerah Pelajaran DiRaja enggau Anugerah Tun Abdul Razak ba pengerami Konvokesyen UKM ke-48.

“Penyulut tu ngayanka nembiak di Sarawak tu bisi kualiti ti chukup manah enda ngira sekalika ba renggat nengeri, menua tauka ba renggat antarabansa.

“Ukai semina dalam bidang pelajar, tang mega ba mayuh bengkah bidang, nembiak Sarawak ulih mandangka penau enggau pemandai sida ba mata dunya,” ku iya.

Snowdan ti mega Tukang Wang Tabung Ekonomi Gagasan Anak Sarawak (TEGAS) mansutka pekara nya lebuh bejaku bejadi Aum Besai ‘Belia 2021’ ti diatur Dewan Bahasa dan Pustaka (DBP) Pampang Sarawak enggau TEGAS ba Balai Budaya DBP Pampang Sarawak ditu, kemari.

Bejaku baru, iya madahka dalam bidang teknologi Sarawak udah bisi SarawakPay kelimpah ari nuju teknologi digital nengah pengawa numbuhka Sarawak Multimedia Authority (SMA) ti ulih mantu ngelakuka pengulih teknologi di Sarawak.

“Aku arap bendar nengah penemu ari nembiak dipegulaika enggau pemansang kereban teknologi, sida ulih sama ngemansang sereta ngangkatka agi imej Sarawak ba renggat dunya.

“Penemu iya nya kereban ti bekuasa diatu. ‘Kecerdasan Buatan’ (Artificial Intelligence-AI) ti majak ngerembai  ketegal runding enggau pemansang penemu bala nembiak ngagai pemesai guna teknologi dalam pengidup ninting hari.

“Ambika chunto, pandemik COVID-19 ngubah chara idup kitai ngagai ngena teknologi pemadah baka meli barang, pemakai enggau chara kereja ti ngena kereban media,” ku iya seraya madahka tu mega lalu muka nyendiaka peluang kereja ngagai nembiak kelebih agi ti bekaul enggau nganjung barang enggau pemakai.

Lebuh ti ngenang pasal program Aum Besai Belia 2021, iya madahka nya setipak enggau teknologi, siti pekara ti chukup bekuasa.

Iya madahka enda ngira sapa ti nguasa penerang, iya ulih nguasa dunya.

“Nya alai, program tu mega dipejalai ngambika nembiak nyempilka diri agi enggau pemansang ke maya hari tu ti lebih berurun, fokus sereta bepelasarka pemaik di menua kitai.

“Baka jaku Christian Lous Lange ti madahka teknologi siti pekara ke chukup beguna tang, iya mega ‘tuan’ ti pemadu tau meri penusah. Enti nadai penemu, nya tau nyadi utai ti tau ngenusah.

“Nya alai kena teknologi enggau chara ti manah awakka kitai nyadi tuan ti nguasa teknologi, ukai orang kuli ti dikuasa teknologi,” ku iya.

Dulu ari nya, ba jaku pengelalu Direktor DBP Pampang Sarawak Abang Haliman Abang Julai madahka Aum Besai Belia 2021 diatur berindik ari nerima sukung ti chukup manah ba program Aum Besai Belia 2019.

Haliman madah, Aum Besai Belia 2021 lebih ngagai pengawa negapka runding enggau ngembuan pengelandik  ke engkeman jeman diatu.

“Program kedua kali tu, dikearapka ulih negapka skop Revolusyen Industri 4.0 ti bepanggai ba ‘Kecerdasan Buatan’ (Artificial Intelligence) enggau ‘Internet Kebendaan’ nyadi pelasar ke dikerandau enggau dipejuaraika.

“Pengujung iya nengah pengawa gempuru kedua kali tu, deka bisi siti resolusyen ti tau didokumen ngambika atur ke patut tau dipejalaika raban ti ngamatka pengarap enggau tuju nempa menua bansa, awakka rebak Z enggau rebak Alpha ila deka ngembuan agenda ti berurun, bisi perambu enggau nitihka ubah,” ku iya.

Sama bisi datai ba program nya kemari Ketuai Pemesai Operasyen TEGAS, Awangku Merali Pengiran Mohamed enggau ke bukai.

  • oleh
  • Advertisement