Anda di sini

Lebih agresif, efektif nagang pengelekai COVID-19 ba sektor pelajar

Advertisement
ADAM
ADAM

KUCHING: Gerempung Pengajar Sarawak (STU) minta opis menteri ti bekaul bejalaika chara ti lebih agresif enggau efektif sereta mungkur semua pekara kena nagang pengelekai COVID-19 kelebih agi ba sektor pelajar.

Presiden STU, Adam Prakash Abdullah madah, nya berindik ari Kluster Pendidikan ti majak nambah ke bekaul enggau pengajar, nembiak sereta staf sekula di serata menua.

Pekara tauka penerang nya chukup ngirauka ati lalu nya kebuah STU seruran minta ngambika chara ti lebih ngasi patut dipejalaika Opis Menteri Pelajar Malaysia (KPM) enggau Opis Menteri Pengerai Malaysia (KKM) kena nagang pandemik COVID-19, ku iya.

“STU nemu pengawa ti dipejalaika KKM, baka raban ari opis pengerai bejalaika pengawa nyidi kes enggau kontak sereta bejalaika proses disinfeksyen maya patut. Tang sekalika chara nya ngasi naka ke diatu? Sekalika assessment risiko ti dipejalaika nya amat ulih mutarka penanggul ti ditapi?

“STU minta ngambika chara ti lebih agresif enggau efektif dipejalaika sereta nentuka mungkur semua pekara awakka nya ngasi agi kena nagang pengelekai igi penyakit nya,” ku iya nengah sebengkah penerang, kemari.

Ku iya, KKM enggau KPM udah nemu nama penanggul ke tau nyadi lebuh sesi sekula dibuka baru kelebih agi ba kandang endur ti mayuh kes, nya alai patut diputarka chara ti ngasi agi sebedau kes nyadi.

Iya madahka sekula seruran bebendar ngemeran sereta ngemeratka prosedur operasyen standard (SOP), tang ukai semua pengajar ulih nyaga semua nembiak laban pengajar mega patut belelak sereta nyendiaka utai ke deka diajar.

Nembiak ukai ‘robot’ ti semina ngaga pengawa nitihka perintah aja ku iya, laban nembiak mega patut bemain sereta begulai enggau pangan diri maya pengajar nadai, lalu sida lalu nya entara risiko ditapi semua orang maya sesi sekula berengkah dipejalaika.

Kelimpah ari nya STU mega ngarapka sekula, Opis Pelajar Pelilih Menua (PPD) enggau Opis Pelajar ngambika seruran beratka sebarang pekara ti nyadi bekaul enggau nembiak tauka pengajar.

Iya madahka nyema kes lebih agi bekaul enggau COVID-19 patut dipadah lengkas ngagai raban tauka sida ti bekaul awakka atur ti patut tau dipejalaika.

“Sebarang kes ba sekula enda patut dilalai awakka pengelekai igi penyakit tu ulih ditagang enggau efektif.

“Kitai semua patut nyadi peranak menua ke bisi tanggungpengawa mantu ngelaban igi penyakit COVID-19,” ku iya.

Berebak enggau tu, STU mega minta KKM (Menteri, Datuk Seri Dr Adham Baba) nyukung sereta berunding ngambika pengajar di serata menua dulu diberi tuchuk vaksin COVID-19.

“Kami ukai minta utai ti nyelai tang semina minta diperundingka nitihka pematut ke pengelikun kelebih ba sida ke ba sekula,” ku iya.

Ensanus, Menteri Pengerai, Datuk Seri Dr Adham Baba madah bisi penambah ba Kluster Pendidikan bekaul enggau nembiak, pengajar enggau staf sekula di serata menua.

Nyentuk ke diatu terang iya, bisi 20 kluster udah ditemu KKM.

“Bisi ditemu kluster bekaul enggau sektor pelajar nganyanka penambah dikaitka enggau rampit bakih sama endur kereja enggau kontak rama.

“Lebuh bisi kes positif diriripotka ba Palan Pengerai Pelilih Menua (PKD) bekaul enggau nembiak, pengajar enggau staf sekula, raban ari opis pengerai deka diasuh bejalaika pengawa nyidi kes enggau kontak sereta bejalaika proses disinfeksyen,” ku iya ba aum pengarang berita ninting minggu CITF di Putrajaya Hari Satu tu tadi.

Advertisement