Anda di sini

KMKK dipinta mesti madahka pasal pengerami rama ti bisi diatur

Advertisement

KUCHING: Ketuai Raban Bansa enggau Ketuai bansa (KMKK) kelebih agi Ketuai bansa (KK) di nengeri tu, dipinta enda tau enda ngeripotka pasal pengerami rama ke bisi dipejalaikaatur.

Sapit Kepala Menteri, Datuk Amar Douglas Uggah madahka pekara nya diputuska Komiti Mutarka Penusah Ngenyit Nengeri Sarawak (JPBNS) pengudah mansik semua kes ti mayuh diripotka bekaul enggau pengerami rama.

Nya alai ku iya, semua KMKK kelebih agi KK patut matau enggau ngeripotka semua aktiviti pengerami rama baka pengerami nikah, pengawa rabat enggau ke bukai ngagai Opis Pelilih Menua ba endur diri.

Opis Pelilih Menua sedia mantu KMKK, iya nya ngelalau sereta minta bantu ari ejensi ti bekaul kena nentuka prosedur operasyen standard (SOP) ke udah bisi dititihka, ku iya.

“Perintah tu berengkah diterit tauka dipejalaika tekala tu.

“Suba kitai endang udah madahka sida (KMKK) patut ngeripot, tang diatu kitai ngaga nya mandatori lalu sida enda tau enda madah ngagai Opis Pelilih Menua nyema bisi aktiviti rama baka nikah, pengawa rabat enggau pengerami rama kebukai dipejalaika ba genturung pendiau tauka rumah panjai.

“Laban enti sida madah ngagai opis pelilih menua, udah nya bala ariopis nya deka mantu sida iya nyendiaka pemesai Rela nyaga sereta nentuka SOP ke udah ditetapka ulih ditithka,” ku iya.

Uggah ti mega Chairman JPBNS mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu,seraya disempulang menteri Kaunsil Kandang menua enggau Pengawa Berumah, Dato Sri Dr Sim Kui Hian enggau Direktor Opis Pengerai Nengeri sarawak dr Chin Zin Hing, kemari.

Uggah madahka nengah chara KMKK enda tau enda ngeripot ngagai Opis Pelilih menua, dikerapka SOP ke udah ditetapka ulih dititihka peranak genturung pendiau tauka rumah panjai.

Iya madahka nengah chara Opis Pelilih Menua nganjung Rela gawa matau ba pengerami rama nya semua SOP baka takah fizikal, ngerejista ba aplikasyen MySejahtera tauka nulis nama enggau ngerikodka pengangat tubuh ulih dititihka.

“Aku bisi peneleba, ba sitak tauka menua aku bisi siku udah nadai lalu tuai rumah madah ngagai Opis Pelilih Menua, ari nya Opis Pelilih Menua minta bala pemesai Rela neritka atur ba rumah panjai nya sekumbang timpuh rabat.

“Lebuh bisi pemesai Rela bejalaika pejalai pengawa, semua SOP ke ditetapka ulih dititihka kelebih agi bisi atur maya deka meri basa ke penudi ngagai niang. Ngena chara tu, kitai amat ngarapka ulih nagang pengelekai penyakit tu,” ku iya seraya madahka tebal agi kes ke nyadi ketegal pengerami rama.

Dulu ari nya, iya madahka KMKK bejalaika tanggungpengawa ti beguna dalam nyaga pengelikun raban bansa ba endur diri ari pengelekai COVID-19.

Sida mega dipinta meri penerang enggau lalau ngagai raban bansa pasal pemesai guna nitihka SOP, ku iya.

“Aku minta raban bansa kelebih agidia menua pesisir beratika pekara tu, laban ngena chara tu kitai ulih mantu.

“Aku ngarapka KMKK ingatka sida iya sebagi ari raban perintah, nya alai sida patut bejalaika tanggungpengawa sida kena nentuka sida gerai, nembiak redak ba genturung pendiau enggau rumah panjai gerai, lalu ari tu rayat Sarawak ulih gerai,” ku iya.

Advertisement