LONG TERAWAN: Chairman Gabungan Parti Sarawak (GPS), Datuk Patinggi Abang Johari Tun Openg madahka diri meri terima kasih ngagai pemutus Kaunsil Tetinggi Perikatan Nasional (PN) ke deka mantu GPS ngambika ulih menang ba Pengawa Bepilih Nengeri (PRN Sarawak) ti deka datai.
Ku iya, GPS nyengkaum Parti Pesaka Bumiputera Bersatu (PBB) ti ari baruh iring iya, Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP) nyambut manah sesapa aja ti deka mantu sida ngambika menang ba pengawa bepilih nya.
“Terima kasih ngagai sida (PN) ti deka nyaup, orang deka mantu kitai nyambut enggau (manah), orang deka ngelaban kitai, kitai nyatup sida,” ku iya madah ngagai pengarang berita pengudah bejadi Bungkur Broadband Menua Pesisir Sarawak (SRBN) ditu.
Kena Hari Minggu nyin tadi, Kaunsil Tetinggi PN sepenemu setuju ngasuh raban pengawa bepilih enggau nembiak redak parti ba tetiap renggat mantu GPS ngambika menang ba PRN Sarawak ti dipelabaka diatur pengudah timpuh perintah emerjensi ti benung dipejalaika diatu abis timpuh.
Sekretari Besai PN ,Datuk Seri Hamzah Zainuddin dalam siti penerang madahka pemutus nya digaga dalam aum Kaun sil Tetinggi PN ti bechairmanka Presiden Bersatu, Tan Sri Muhyiddin Yassin kena Hari Enam minggu nyin tadi.
Brebak enggau nya, Abang Johari ke mega Kepala Menteri Sarawak enggai ngenang sentang peneranh Komisioner PAS nengeri, Jofri Jaraiee ngambika parti nya diberik awak bediri minta pilih abis nadai ba siti ari 82 sitak Kunsil Nengeri (DUN) maya PRN Sarawak ntya ila.
“Aku agi di Long Terawan, badai berundingka sentang pekara nya (peminta Jofri). (Saya) aku agi kiruhka pengawa masang broadband (SRBN),” ku Abang Johari enggau munyi jaku ke betundi. — Bernama