KUCHING: Gerempung Pengajar Bumiputera Sarawak (KGBS) nyukung sesi sekula berengkah dibuka baru, lalu patut beoperasyen ngena chara begintir, kelebih agi ba zon Mirah tauka bisi risiko tinggi COVID-19.
Presiden KGBS, Ahmad Malie ngarapka sesi muka baru sekula di nengeri tu ulih ditusun baru nithka gaya kes pandemik COVID-19 ba tiap zon.
“Nyema patut (sesi sekula) diatur begintir kelebih agi ba sekula ti mayuh nembiak tauka enrolmen, KGBS chukup nyukung.
“Nya alai, KGBS amat nyukung sereta muji chara proaktif ti dipejalaika Koordinator Komiti Mutarka Penusah Ngenyit Bagi Menua Sibu ti mega Menteri Muda Pelajar Sarawak, Dr Annuar Rapaee ti madah semua sekula sekondari enggau primari ba bagi menua Sibu deka dipejalaika nengah chara begintir pengelama empat minggu nyentuk ke sekula dibuka minggu tu kena nagang tauka mutuska rentayan pandemik COVID-19.
“Ngena chara tu, KGBS arap bendar ulih ngurangka penyekut nembiak sereta ngurangka risiko rampit COVID-19 ba sekula,” ku iya.
Ahmad bepenemu zon bukai kelebih agi dalam zon Mirah enggau ke diasaika berisiko patut belalau tauka beteladanka atur ti dipejalaika ba bagi menua Sibu nya.
Taja pia ku iya, nyema zon nya udah ba tikas ti lebih manah, sesi sekula patut dipejalaika baka selama.
“Nyema zon bukai agi (zon) Mirah enggau gaya COVID-19 agi ba tikas ti ngirauka ati sereta bisi ati deka nitihka chara zon Sibu, ba penemu KGBS nya chara ti pemadu engkeman kena nyaga pengelikun enggau pengerai bala di sekula ari COVID-19.
“KGBS bebendar madah chara ti baka nya ulih dipejalaika nyema zon nya agi ngirauka ati. Taja pia nyema zon nya ba tikas ti lebih manah, sekula ba zon nya patut beoperasyen baka selama,” ku iya.
Berebak enggau tu KGBS mega ngelalau enda ngira chara bakani operasyen sekula dipejalaika, semua orang patut terus nitih sereta ngemeranka prosedur operasyen standard (SOP) enggau terit.
Anang enda ibuhka SOP sereta patut ngemeratka disiplin nengah chara ngemeran enggau ngemeratka SOP dalam pengidup ninting hari, ku iya.