Anda di sini

KM: Perintah nengeri komited ngubah tikas pengidup rayat di menua pesisir

Advertisement
 Abang Johari lebuh ti bejaku ba pengerami begulai enggau Pemesai JTS di Menara Pelita, kemari.
KOMITED: Abang Johari lebuh ti bejaku ba pengerami begulai enggau Pemesai JTS di Menara Pelita, kemari.

KUCHING: Chara baru deka dikena ngemujurka projek Skim Ngemesaika Genturung Pendiau enggau kandang rumah panjai ba pengawa ngubah tikas pengidup peranak menua pesisir di nengeri tu.

Kepala Menteri Datuk Patinggi Abang Johari Tun Openg madah, perintah nengeri komited ngubah tikas pengidup rayat di menua pesisir nengah projek nya.

Ku iya, nengah Skim Ngemesaika Genturung Pendiau, penyampau penyeranta peranak menua pesisir di nengeri tu ulih ditambah manah nengah chara meri penyampau tambah ngagai aset ti diempu peranak sechara individu kelebih agi tanah.

Ku iya, Skim Ngemesaika Genturung Pendiau enggau kandang rumah panjai deka dipejalaika nengah chara baru ke alai taba enggau infrastruktur nyengkaum ngaga jalai enggau parit semin, bekal ai enggau elekterik disediaka, semua ungkus ditanggung perintah nengeri.

“Tu deka ngubah gaya pengidup peranak di menua pesisir. Bisi rejeki, kami besaumka nya enggau rayat...Ikas Penyeranta ti baru, iya nya RM2,000 lebih, isu nya baka ni deka madahka definasyen penyeranta?

“Definasyen penyeranta tau dipeda sekalika nengah penatai pemisi mata duit sechara ninting bulan tauka  bepelasar aset diempu individu. Enti kita ngembuan aset ti tinggi rega, kita enda tau dikategorika nyadi orang seranta,” ku iya.

Iya bejaku munyi nya maya ba Pengerami Begulai enggau Pemesai Opis Tanah enggau Survei 2021 di Menara Pelita ditu,kemari.

Ku Abang Johari, dalam prinsip ekonomi penuduk sesebuah kompeni ditentuka rega aset enggau pejalai mata duit.  

Ku iya, nyema penyeranta didefinasyen bepelasarka rega’cash’ aja, tentu mayuh rayat Sarawak ‘tepekul’ dalam penyeranta.

“Enti kitai ulih ngangkatka rega aset peranak genturung pendiau, sida enda agi dikategori nyadi orang seranta. Nya kebuah kitai mesti meda definasyen penyeranta tu enggau chara mungkur semua lalu dipejuraika sechara ekonomi, laban nya enda tau dikategori bepelasarka penatai pemisi mata duit aja,” ku iya.

Ku Abang Johari, Menteri Besai Tan Sri Muhyiddin Yassin lebuh ke nemuai seraya kereja ke Sarawak minggu nyin tadi, madahka diri temegah ati mendingka penerang ari   Sekretari Perintah Nengeri, Datuk Amar Jaul Samion  bekaul kuing pemansang Sarawak.

“Menteri Besai madahka kitai udah bekunsika  tanggungpengawa enggau objektif. Iya mega madahka projek hidrogen nya utai ke baru, baharu didinga iya. Reti nya ‘tau mih kitai tu’,” ku iya.

Berebak engagu nya, iya ngenataika pengaga ati ngagai JTS Sarawak klaban udah mujur nyukat kelingi tanah hak adat Bumiputera (NCR) sepenyampau 40,111 hektar enggau 12,322 hektar lot individu taun nyin tadi.

Iya mega muji pengawa JTS ngemansangka sisem eLASIS laban nya udah nyadi chunto ngagai opis perintah bukai di serata menua.

“Aku pechaya eLASIS tu deka ditambah manah. Pandemik COVID-19 udah ngajar kitai ngena teknologi lalu kitai benasit manah laban udah ngepunka inisiatif ekonomi digital ba taun 2017,” tambah iya.

Iya mega pechaya JTS deka mantaika generasyen ke pemadu baru eLASIS, kena negapka pengawa meri servis kelebih agi ngagai rayat nengeri tu.

Sama bisi datai, Sapit Kepala Menteri Datuk Amar Awang Tengah Ali Hassan. Menteri Muda Pemansang Mengeri enggau Pengeraja Asal, Datu Len Taliff Salleh enggau Direktor Opis Tanah enggau Survei, Abdullah Julaihi.

Advertisement