SIBU: Operasyen sekula ungkup sekula primari enggau sekondari di Sibu ti berengkah minggu tu deka dipejalaika nengah chara begintir kena ngurangka penyampau nembiak ti datai ke sekula ungkup sekali sesi.
Pengatur Komiti Mutarka Penusah Ngenyit Bagi Menua Sibu Dr Annuar Rapaee madah, chara tu dikena dalam nyaga pengerai enggau pengelikun nembiak, kelimpah nentuka pelajar sida enda dilengka.
“Kitai udah baum pengelama tiga hari lalu aum kepenudi iya nya sehari tu (kemari).
“Prinsip kitai deka ngurangka penyampau nembiak di sekula ungkup sekali sesi.
“Nyema dua minggu ti udah tauka sebedau kemisi sekula, semua nembiak sekula primari udah datai ke sekula,” ku iya lebuh ti ‘live’ bekaul perambu muka sesi sekula di pelilih menua Sibu, kemari.
Ungkup sekula primari, Hari Satu, Hari Tiga enggau Hari Lima nembiak Primari 4, Primari 5 enggau Primari 6 nurun ke sekula lalu Hari Dua enggau Hari Empat ungkup nembiak prasekula, Primari 1, Primari 2 enggau Primari 3.
Beserimbai enggau nya, ungkup sekula sekondari nembiak Form 4, Form 5 enggau Form 6 deka nurun ke sekula dalam kelas ninting hari.
Ungkup kelas peralihan enggau Form 3 deka nurun ke sekula maya minggu keterubah enggau ketiga lalu Form 1 enggau Form 2 nurun maya minggu kedua enggau keempat.
“Nyema nembiak ti enda mansang ke sekula maya hari enggau minggu nya, sida deka bejalaika sesi ngajar enggau belajar di rumah (PdPR).
“Nengah chara tu, paling enda sida ulih betunga mua enggau pengajar dua tauka tiga hari dalam seminggu,” ku iya seraya nambah, chara tu deka dipansik baru nitihka penyampau kes COVID-19 di pelilih menua Sibu.
Kelimpah ari nya, ku iya, pengajar kelas mega patut numbuhka ‘Whatsapp’ beraban kena nanya bekaul gaya nembiak sekalika sida bisi kontak semak tauka dalam ruang bilik ti bisi positif COVID-19 maya hari nya.
“Pengajar kelas deka nganjung mesej kena nentuka bisi orang ti tabin, diperansang enda nurun ke sekula maya hari ti nangkanka nya,” ku Dr Annuar nerang.
Bekaul nembiak SPM ti enda nurun peresa sebedau tu ketegal COVID-19, ku iya madah, sida deka peresa nitihka timpuh ti udah diatur baru iya nya berengkah 6 nyentuk 23 April tu.
“Bisi 223 iku nembiak di mengeri Sibu ti bisi bekaul enggau isu tu.
“Tu peluang kepenudi ungkup sida nembiak ti ngambi SPM.
“Nyema sida enda nurun peresa tu, sida enda bulih pemutus lalu enggai enda pan ngambi peresa nya baru taun ti deka datai,” ku iya nambah.
“Nyema chalun ti enda tau enda ngambi peresa tu positif COVID-19, kitai deka nyendiaka palan sida ngambi peresa di sepital.
“Nyema sida semina kena kuarantin, kitai mega deka nyendiaka palan ba palan kuarantin ungkup sida ngambi peresa,” ku iya.