SARIKEI: Ketuai ba renggat baruh kelebih agi ketuai komuniti enggau ketuai bansa (KMKK) patut nemu polisi perintah nengeri sebedau ngenataika nya ngagai komuniti di kandang menua dipegai sida empu.
Kaban Kunsil Nengeri (ADUN) Meluan Rolland Duat Jubin madah, KMKK tu iya nya baka ‘jematan’ entara perintah enggau komuniti.
“Penerang ti betul ke dibai KMKK ngagai komuniti tu mega ulih ngurangka saru penemu sereta ngenegapka kaul entara raban pengereja pengawa perintah Sarawak enggau rayat.
“Kerejasama rat entara KMKK enggau Komiti Pemansang enggau Pengelikun Genturung Pendiau (JKKKK) mega endang beguna, kelimpah kaul entara ejensi perintah nengeri ke bukai dalam nentuka genturung pendiau tauka rumah panjai ari baruh pegai sida nerima pemansang enggau meruan.
“Berindik ari nya, kitai endang bebendar ngarapka KMKK ulih bejalaika tanggungpengawa ti udah diberi ngagai sida enggau naka pemanah lalu ngembuan ulah ti enda bechiping dalam semua pekara,” ku Rolland.
Iya madah munyi nya lebuh ti bejaku ba Pengerami Nyuaka Setipikit Ketuai Komuniti enggau Ketuai Bansa Pelilih Menua Julau, kemari.
Pengerami ti diatur Opis Pelilih Julau di Balai Komuniti Julau nya udah digulu urung 120 KMKK ari Pelilih Menua Julau.
Dalam jaku dipadahka iya, Rolland mega minta KMKK ngmbika seruran bebendar nambahka pengelandik sida dalam mayuh macham chara nyengkaum teknologi pemadah (IT).
Ku iya, tu endang beguna kena nyemakaka tanggungpengawa KMKK ke diatu majak ngerembai.
“Diatu, tanggungpengawa siku KMKK endang besai lalu nya nyengkaum mayuh macham bidang.
“Berindik ari nya, kitai ngarapka KMKK ti dichiri baru tauka sida ke baru nya ulih bejalaika tanggungpengawa sida enggau naka pemanah,” ku Rolland nyemetak.
Berindik ari nya, pengari Pemesai Opis Pelilih Menua Julau Louis Yeo Soon Guan dalam jaku pengelalu iya mega minta KMKK ngambika seruran ngelalau nembiak redak ti dipegai sida mesti nyaga diri enggau nitihka chara ti betul nyeliahka COVID-19.
“Tu endang beguna kena mutuska rentayan pengelekai pandemik COVID-19 di Pelilih Menua Julau enggau juluk kes positif bisi nurun lalu Pelilih Menua Julau ulih pulai baru ngagai status Gadung,” ku Louis.
Ba program nya, bisi 49 tuai rumah nerima setipikit nyiri ti baru, lalu siku penghulu, dua kapitan enggau 52 tuai rumah nerima setipikit nyambung baru tanggungpengawa sida.
Sama bisi datai iya nya Sekretari Politik Kepala Menteri Brian Fung Kok Shiun.