KUCHING: Perikatan Nasional (PN) ari baruh iring Menteri Besai Tan Sri Muhyiddin Yassin deka meri sukung penuh kena nentuka Gabungan Parti Sarawak (GPS) ulih menang besai ba Pengawa Bepilih Nengeri (PRN) ke deka datai.
Bejaku ba aum pengarang berita pengudah ngabas Projek Ngangkatmanah Sepital Umum Sarawak kemari, Muhyiddin madah, enda ngira baka ni gaya PN di Sarawak tu ari Parti Pribumi Bersatu Malaysia (BERSATU), PAS deka meri sukung penuh ngagai GPS.
“Ke pemadu beguna nadai pambar. Bisi kerusi nadai kerusi nya pekara ke dua, nama ti pemadu beguna kitai deka nentuka GPS menang besai ke bisi di Sarawak tu.
“Nama ke beguna amat iya nya bulih sukung tegap ari pengundi ngambika perintah nengeri ulih ditumbuh baru, lalu lebih mayuh sitak ulih endur menang,” ku iya.
Ditanya sekalika BERSATU deka engkahka chalun ba sitak Kunsil Nengeri (DUN) Krian ti disandang Datuk Ali Biju, Muhyiddin ti mega Presiden BERSATU madah nya bepanggai ba runding Kepala Menteri enggau pemesai di Sarawak ngaga pemutus.
“Kitai deka berandau. Aku enggai ngenang panjai pasal tu. Enti bisi awak ila kitai deka berandauka pekara tu,” ku iya.
Dulu ari nya Muhyiddin madah, iya empu deka mantu ngiring GPS ngulihka pemujur ba PRN ti deka datai.
Iya mega besemaya deka meri kerejasama laban kaul tu beguna amat lalu chunto kerejasama politik ke udah ditempa entara perintah besai PN enggau perintah GPS, iya nya chunto ti pemadu manah.
Nya alai, iya ngarapka kerejasama politik ti manah tu ulih dikemanahka agi ke pemansang rayat di serata menua kelebih agi ba Sarawak tu.
Ngenang pasal penemuai dua hari ke nengeri tu, Muhyiddin madahka iya diatu lebih meretika nama utai ti diguna rayat di Sarawak ti patut dikemeratka.
Iya mega arap bendar ari baruh iring Kepala Menteri Datuk Patinggi Abang Johari Tun Openg sereta kaul rat enggau perintah besai ari baruh iring iya, nengeri Sarawak dikearap ulih nyapai pemansang ti lebih manah dalam timpuh 10 taun ke deka datai.
“Aku udah berandau panjai enggau Kepala Menteri sereta bakih kabinet menteri ba renggat Sarawak. Nama utai ke patut kitai deka mantu ba pengawa ngemansangka nengeri tu.
“Aku meretika bisi pekara besai ti deka dikemeratka di Sarawak tu enggau dalam Langgur Pemansang Malaysia Lumpar ke-12 (RMK12), kitai deka beratka kelebih agi bekaul enggau infrastruktur fizikal Jalai Besai Pan Borneo enggau Infrastruktur virtual deka dilengkaska,” ku iya.
Muhyiddin mega arap bendar rayat nengeri tu chukup bepuas ati sereta deka terus meri sukung tegap ngagai iring ke diatu di nengeri tu.
Sama bisi datai Kepala menteri enggau Sapit Kepala Menteri Datuk Amar Awang tengah Ali Hasan, Menteri Kanan Kereja Raya Datuk Seri Fadillah Yusof, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau ke bukai.