Anda di sini

Perintah sedia mansutka belanja besai kena nyelamatka nyawa rayat, ekonomi menua

Advertisement

KOTA SAMARAHAN: Menteri Besai Tan Sri Muhyiddin Yassin madah, perintah sedia mansutka belanja besai kena nyelamatka nyawa rayat enggau ekonomi menua ketegal pengelekai pandemik COVID-19 diatu.

Ku iya, pengelekai penyakit nya balat meri pemar ngagai perintah laban nya bekaul enggau nyawa sereta mega ngeruga ekonomi menua, ngujungka perintah ngemansutka belanja besai kena meli ubat, nentuka katil sepital chukup nyengkaum nambahka penyampau lutur enggau indu misi.  

“Kami ngaga tu laban kami mesti nyelamatka tetiap nyawa rayat lalu perintah udah ngemansutka belanja entara RM7 bilion nyentuk RM8 bilion kena mutarka penanggul COVID-19, lalu penyampau nya enda nyengkaum duit ke dikena meli vaksin,” ku iya maya bejaku ba Program Begulai enggau Peranak Samarahan di Institut Pematih Pengajar Kampus Tun Abdul Razak, ditu kemari.

Ku Menteri Besai, perintah udah minta galauka vaksin dalam kuantiti besai laban enggau nempinaka nyawa rayat.

Iya mega madahka diri berasai puas ati enggau proses program vaksinasyen di Sarawak sereta besemaya deka minta Opis Menteri Pengerai nganjung mayuh agi vaksin COVID-19 ke nengeri tu.

Berebak enggau nya, Muh-yiddin madah taja pan betapi enggau situasyen ti pemadu mar dalam sejarah menua ketegal pengelekai pandemik nya, rayat tetap beserakup.  

Ku iya pengudah ke dichiri nyadi menteri besai, iya terus betapi enggau pandemik tu, ngujungka atur lengkas mesti diambi.

“Pemutus neritka Atur Nagang Pemindah (PKP) mesti diambi awakka rayat selamat ari pandemik di serata menua. Taja pan empas nya besai tang tuju (bejalaika PKP iya nya) ngambika rayat selamat,” ku iya.

Ku Muhyiddin, perintah mesti ngambi atur kena nyaga nyawa rayat enggau empas ekonomi, laban nyauka semua sektor ekonomi ditutup nyentuk ke menua rugi RM2.4 bilion sehari sekumbang neritka PKP.

Ku iya, perintah udah mantaika bemacham pakej bantu ke beungkus RM300 bilion kena mantu raban ti napi pemar, ngujungka pekara tu linsur manah lalu nyauka 100 peratus sektor ekonomi udah dibuka baru kelimpah beberapa sektor baka dagang temuai.

“Kitai diatu sedia beroperasyen baru baka ke asal lalu kitai bisi meda penampak ba ujung lubang,” ku Muhyiddin seraya madahka tusun pengawa perintah mega mesti tegap sereta dikachau ngambika perintah ulih fokus ngagai pengawa mantu rayat.

Berebak enggau nya, iya minta rayat Sarawak majak meri sukung ngagai perintah besai ke diatu ngambika ulih terus mantu nengeri nya nyapai juluk nyadi sebuah nengeri maju ba taun 2030.

Ngenang pasal penemuai ke pemadu baru iya ngagai nengeri tu ti nyadi penemuai keterubah iya pengudah ke nyadi menteri besai kena bulan Mac taun nyin tadi, Muhyiddin madahka bisi asai ati ti nyelai lebuh ke nemuai seraya kereja sekali tu, laban nya asai baka ‘pulai ke menua diri empu’.

“Penemuai tu chukup besai reti. Ati aku bisi berasai lebuh Kepala Menteri (Datuk Patinggi Abang Johari Tun Openg) madahka GPS (Gabungan Parti Sarawak) deka majak meri sukung penuh ngagai aku nyadi Menteri Besai,” ku iya.

Pengerami begulai nya sebagi ari program ti ditusun ba penemuai iya ke Sarawak berengkah ari ensanus, lalu iya dipelabaka deka ngabas projek ngangkatmanah Sepital Besai Sarawak lemai kemari sebedau mulaika diri ke Kuala Lumpur. — Bernama

Advertisement