SIBU: Pengawa ngumpul teda minyak sumai ke dipejalaika Opis Kaunsil Kandang Menua Pesisir Sibu (SRDC) berengkah kemari.
Chairman SRDC Sempurai Petrus Ngelai madah, tuju pengawa tu iya nya setipak enggau Juluk Pemansang ti Meruan (SDG) ti dibai Pertubuhan Bangsa-bangsa Bersatu (PBB) lalu tu engkeman enggau agenda pemansang komuniti ari baruh Opis Menteri Kandang Menua enggau Pengawa Berumah Sarawak.
“Kena ngemujurka agenda tu, SRDC bejalaika pengawa tu tekala nya sehari tu (kemari).
“Inisiatif tu deka dipejalai di sitak ti ari baruh SRDC,” ku iya ditu, kemari.
Ungkup penemu semua, ku iya nerang, pengawa ngumpul teda minyak sumai tu patut digaga baka ti udah disahka nyadi siti ari penetap bulih lisin ngagai semua sida ti megai lisin kedai pemakai ari baruh pegai SRDC.
“Pengawa ngumpul teda minyak sumai tu deka dibagi ngagai tiga renggat iya nya ti ngaul semua kedai pemakai baka pak kupi, restoran enggau semua pemegai lisin ti bekaul ke berejista ari baruh SRDC.
“Renggat kedua iya nya ti ngaul kedai sereta bansal komersial lalu renggat ketiga iya nya ngaul ruang bilik,” ku iya.
Beserimbai enggau nya, ku iya, Unit Servis Mensia Mayuh enggau Pengerai Mensia Mayuh SRDC deka ngemansutka notis sereta pom ngerejista ti bekaul enggau pekara nya ngagai semua raban.
Ku Sempurai madah, kerejasama komuniti endang diguna ngambika enda muai teda minyak sumai ke ulih betekang ba dalam paip lalu deka ngujungka parit sebat lalu deka ngeruga sistem parit.
Ku Sempurai nambah, semua teda minyak sumai ke udah digumpul nya deka dianjung lalu disimpan enda lama di Bintangor.
Mensia mayuh ti ngembuan sebarang tanya enggau silik, tau betelefon ngagai pengereja pengawa SRDC ti megai tanggungpengawa dalam pengaa ngumpul teda tu iya nya Ling Tung Ang tauka Jacklin Lasum ba lumur 084-336077.