KUCHING: Sukung Sarawak maya krisis politik ti nyadi di menua setaun ke udah, nyadi penyelamat negapka menua.
Menteri Besai Tan Sri Muhyiddin Yassin madah, iya meri besai terima kasih sereta ngaku bantu Gabungan Parti Sarawak (GPS) ari baruh iring Datuk Patinggi Abang Johari Tun Openg.
“Maya aku begunaka sukung enggau bantu GPS ari baruh iring Abang Jo (Abang Johari) datai nyelamatka...Sarawak udah nyelamatka maya (krisis politik).
“Aku pechaya pekara ti digaga tu ukai ketegal berundingka aku nyadi Menteri Besai tang krisis ti enda disadang enggau gaya dalam menua ti eda meruan, ngujungka sukung sida nyelamat menua.
“Bantu ketuai Sarawak udah negika sebuah perintah beguna amat lalu nya bantu ke besai amat,” ku iya lebuh bejaku maya Merarau Begulai enggau Ketuai Raban Bansa ti digulu Kepala Menteri, Datuk Patinggi Abang Johari Tun Openg ditu, kemari.
Ku Muhyiddin, bantu nya ukai semina ngagai iya tauka parti BERSATU tang kena mulaika penegap menua.
Ku iya, lebuh dichiri nyadi Menteri Besai, iya pemar ke besai ukai semina ba gaya politik ti enda meruan tang mega krisis pengelikun, iya nya pandemik COVID-19 ti nyadi di menua tu.
“Tang aku mesti ngesan tanggungpengawa enggau pengandal ti diberi rayat ngambika bisi timpuh ulih lama nyadi (PM) dalam sesiti timpuh nyentuk ke situasyen pulai baka selama,” ku iya.
Taja pia ku iya, pekara ke beguna amat diatu iya nya isu mensia, ukai politik iya empu deka betemu enggau rayat lalu mendingka sebana sida nyengkaum di Sarawak.
Ku Muhyiddin, isu diatu nadai bekaul engau berebutka kuasa tang pekara mensia laban perintah mesti mulaika pemanah ekonomi, sosial enggau gaya idup rayat, ti tebal agi sida napi pemar ketegal COVID-19.
“Rayat udah bansu enggau ulah sekeda kaban politik ti berundingka pekara kuasa, penuduk, pangkat enggau ke bukai.
“Bisi orang madah ngagai aku, nama kebuah aku enda nyakal jaku tuduh sekeda orang, aku nemu semua nya tang peakra keterubah ba auku iya nya raya, nyaga pengelantang pendiau rayat mesti dikemeratka,” ku iya.
Berebak enggau nya, Abang Johari lebuh ke bejaku madahka perintah GPS komited mantu perintah besai ari baruh pegai Perikatan Nasional (PN) ari sukut ngiring menua.
“Naka ke diatu GPS diarika Parti Pesaka Bumiputera Bersatu (PBB), Parti Rakyat Sarawak (PRS), Parti Rakyat Bersatu Sarawak (SUPP) enggau Parti Demokratik Progresif (PDP) begulai sereta sepenemu neruska penegap menua.
“Laban enti bisi likun, kami mega ulih mantu perintah besai ari sukut ngiring menua sereta bisi kaul dalam polisi inklusif perintah,” ku iya.