Anda di sini

KKM deka ngena servis bilun engkabang mai vaksin ke kandang menua ulu

Advertisement
 Henry (tengah) begulai enggau raban KKM Lawas pengudah tembu betuchuk dos kedua vaksin COVID-19 di Lawas.
UDAH NERIMA VAKSIN TI KEDUA: Henry (tengah) begulai enggau raban KKM Lawas pengudah tembu betuchuk dos kedua vaksin COVID-19 di Lawas.

LAWAS: Opis Menteri Pengerai Malaysia (KKM) deka ngena servis bilun engkabang kena mai vaksin ke palan ti jauh ba kandang menua ulu di pelilih menua tu.

Sapit Menteri Pemansang Menua Pesisir (KPLB) Malaysia Datuk Henry Sum Agong madahka kelimpah ngena bilun engkabang raban KKM ke bukai mega deka bejalaika pengawa nengah jalai darat tumu agi seraya ti nganti penatai vaksin tu lalu ngatur pengawa betuchuk ngagai peranak di kandang menua ulu nya.

“Kelimpah ari bilun engkabang KKM mega udah ngelangkar pelin meri vaksin ti strategik ke Ba’Kelalan sereta genturung pendiau ke bukai ti jauh di kandang menua bebukit ti penyauh pejalai nyentukka enam jam nengah jalai darat,” ku iya pengudah nerima tuchuk vaksin COVID-19 bansa Pfizer BioNTech dos ti kedua ba Opis Palan Latih JAKIM Lawas kemari.

Henry ti nyadi ketuai raban pengereja pengawa perintah sereta raban terabai menua Lawas iya nya entara penerima vaksin ti tumu kenyau ari dua minggu nyin kemari.

Iya mega minta komuniti di kandang menua pesisir sereta kandang menua ulu di pelilih menua Lawas ngambika lengkas ngerejista nengah aplikasyen ti udah disediaka tauka ngerejista nengah Ketuai Komuniti enggau Ketuai Bansa (KMKK) sida empu.

Ku iya madah, pengudah nerima tuchuk dos ti kedua, iya nadai ngasaika sebarang empas bukai lalu semina bisi ngasaika lelak mimit.

Advertisement