KUCHING: Penyerakup enggau pengelikun ba semua ti dipeda majak kurang diatut patut diterenak baru kena nempa rebak ti ngembu an ulah nyadi mensia ke manah.
Pekara itu dipadahka Menteri Muda ba Opis Kepala Menteri (Pekara Korporat enggau Unit Komunikasyen Perintah Sarawak) Abdullah Saidol ti minta pengemeran media massa bejalaika tanggungpengawa mulaika ba pekara nya ba rayat pupu bansa enggau jalai pengarap di nengeri tu.
“Kini ke penunga penyerakup ti kala ditengah aku suba, kinika penunga penyiru, basa enggau pengerurus ati dalam mensia ti kala ditengah aku maya jeman ke agi biak suba.
“Diatu di luar din kasar amat sereta ngamba utai ti enda manah, betenah, jalai pengarap dipolitikka, isu entara pupu bansa majak balat enggau ke bukai.
“Nya alai asai aku ngena peneleba RTM (Radio Televisyen Malaysia) pengelama 75 taun, aku arap endar ngena peneleba nya nuan enggau bala bakih media massa ulih mulaika penyerakup enggau pengelikun ba rayat kitai,” ku iya lebuh bejaku ba pengerami ngintu penumbuh ke-75 RTM di Auditorium P. Ramlee ditu kemari.
Kelimpah ari nya, Abdullah medahka pengemeran media massa diatu mega betapi enggau pemear nyeliahka berita palesu dalam media sosial.
Tambah iya,enggau pemansang teknologi digital diatu, pengawa ngenataika pemadah lebih mudah sereta jampat.
Taja puia ku iya, bisi mega sekeda individu ti jai runding ngena platform tu ngerembaika berita palesu enggau pemadah ke salah.
“Nya alai, aku pechaya RTM ti nyadi sebagai sebuah channel berita menua deka majak releven lalu deka majak bejalaika pengawa ke beguna amat tu ungkup tetiap berita ti kelabu sereta kelabur enggau chelum nya ti dipadah enggau betul begulai enggau bakih media massa ke bukai,” ku iya.
Sama bisi maya nya, Direktor Penabur Berita Sarawak Abdul Hadi Mohd Yusoff, Ex- Ketuai Direktor Penabur Berita RTM Datuk Norhyati Ismail, Ex- Ketuai Direktor Penabur Berita Sarawak Datuk Ahmad Shafiee Yaman enggau temuai dipebasa ke bukai.