KUCHING: Opis perintah patut fokus ngagai chara ngurangka penanggul birokrasi sereta ngubah tauka mansik baru proses enggau prosedur, awakka ulih chakah mantu semua mensia mayu kelebih agi ke ba kandang menua pesisir.
Menteri Besai, Tan Sri Muhyiddin Yassin madah, pandemik COVID-19 udah meri empas ukai semina ngagai sektor ekonomi tang mega sektor bukai nyengkaum sektor opis perintah.
Entara pemar tauka penanggul besai ba pengawa deka nyendiaka servis perintah ku iya, chara deka meri servis enggau bemacham bantu kelebih agi ngagai rayat ti diau ba kandang menua ulu ke bedau bisi infrastruktur enggau bungkur internet.
Berindik ari pekara nya, ngenegapka sektor opis perintah entara agenda beguna ti seruran dikemeratka dalam Perintah Perikatan Nasional (PN), ku iya.
"Fokus besai perintah iya nya nentuka servis ti disedia tauka diberi perintah nya sikar enggau kemerah rayat. Chara tu amat beguna ngambika mesej enggau bantu ulih dikenataika enggau efektif ngagai raban ditagit ti kena empas tauka penanggul.
"Fokus patut ngiga chara ngurangka penanggul birokrasi awakka kitai ulih mantu semua mensia mayuh kelebih agi ba kandang menua pesisir,
"Ambika chunto ba renggat Opis Bekuasa Kandang Menua (PBT), enda ngira bagi atur ti ditemu enda agi manah patut dipansik baru enggau dikemanah agi," ku iya.
Muhyiddin mansutka pekara nya lebuh bejaku ba Pengerami Betemu Khas iya begulai enggau Pengereja Pengawa Opis Perintah Nengeri enggau Perintah Besai Di Sarawak, ti diatur ba sebuh hotel ditu, kemari.
"Kemudahka proses peminta bantu rayat. Pia mega peminta ari orang dagang, pengemeran enggau pemeranak puku. Tetiap peminta patut diperundingka enggau manah," ku iya.
Bejaku baru, iya madahka pekara nya mega dikemeratka ba renggat kabinet perintah besai awakka pengatur pengawa ti ba renggat ke pemadu mar enda ngena atur ke udah bisi.
Nya bepemu atur ke udah bisi nya patut dikemanahka agi, awakka ulih dikena napi sekalika maya mutarka pekara ti mudah tauka mar.
"Tu begunaka kitai mansik baru enda ngira proses tauka prosedur ke udah bisi ti dikumbai nagang sereta ngujungka lubah dikereja, tusah dipejalaika dalam siti timpuh ke patut dipejalaika enggau lengkas, (proses enggau prosedur nya)endang patut diubah.
"Ba renggat perintah besai aku udah nyiri Ketuai Sekretari Menua enggau komiti ti ditumbuhka ulih ngubah semua pekara ti enda setipak agi dikena ba renggat opis menteri, ejensi, PBT maya napi pekara mar.
"Enti kitai agi ngena atur ti begunaka timpuh lama maya deka ngemendarka peminta maya jeman kitai napi pemar diatu, tu deka meri penanggul besai ngagai rayat," ku iya.
Nambahka nya, iya ngarapka pengereja pengawa opis perintah nengeri enggau besai ulih bejalaika tanggungpengawa nyadi pemudahchara kena ngemudahkan pengawa ke deka diagaga mensia mayuh menua tu ba dalam komuniti setipak enggau agenda ngenegapka sektor opis perintah.
Ngena teknologi kelebih agi maya pengudah COVID-19 dalam servis opis perintah mega, udah tentu deka ngemanahka agi pengawa nyendiaka servis opis perintah, ku iya.
Sama bisi ngulu pengerami nya kemari Kepala Menteri Datuk Patinggi Abang Johari Tun Openg, Sekretari Perintah Nengeri Datu Jaul Samion, Sapit Kepala Menteri, menteri kabinet nengeri, menteri kabinet perintah besai sereta pengereja pengawa opis perintah nengeri enggau besai.