KUCHING: Perintah Sarawak meri sukung penuh ngagai Menteri Besai Malaysia, ngiring menua ti ngemeran sereta ngemeratka penegap politik.
Kepala Menteri, Datuk Patinggi Abang Johari Tun Openg madah, laban politik ti tegap ulih mai pemansang enggau narit pemeranak puku ari luar menua ke nengeri tu.
"Pengidup kitai jemah ila, enti kitai ngembuan penegap politik ti manah, reti nya tu deka nyadi pematak ngagai pemeranak puku enggau pemansang kitai.
"Nya kebuah,Gabungan Parti Sarawak (GPS) nyukung Menteri Besai (Datuk Patinggi Tan Sri Muhyiddin Yassin) nyadi Menteri Besai laban ngenegapka (politik) menua.
"Lalu aku arap bendar enti menua kitai tegap kitai ulih betapi enggau pemar tauka penanggul ti lebih besai.
"Sehari tu maya (menua betapi) enggau COVID-19, nuan (PM) tetap agi mutarka penanggul ari COVID-19. Meri puji ngagai PM," ku iya.
Abang Johari Mansutka pekara nya lebuh bejaku ba Pengerami Betemu Khas Yang Amat Berhormat Tan Sri Muhyiddin Yassin Menteri Besai Malaysia Begulai Enggau Pengereja Pengawa Opis Perintah Nengeri enggau Besai ba Srawak ti diatur ba sebuah hotel ditu, kemari.
"Aku deka madah ditu, nya kerejasama entara kitai (Perintah Nengeri enggau Besai) chkup rat enggau pia mega entara pengereja pengawa opis perintah," ku iya.
Bisi ba pengerami nya, Muhyiddin, Sapit Kepala Menteri Datuk Amar Douglas Uggah Embas, Sekretari Perintah Nengeri Datuk Amar Jaul Samion enggau bala menteri kabinet nengeri enggau perintah besai sereta pengereja pengawa opis perintah.