SRI AMAN: Menteri Muda Penge lantang Komuniti Sarawak, Datuk Francis Harden Hollis udah nyuaka chek pampas tanah RM 596,961.39 ngagai 74 iku peranak di sepemanjai projek jalai Ulu Paku ditu, b edau lama udah.
Pampas nya diberi kena ngambi tanah sida di sepemanjai projek jalai nya enggau kereja nyambung paip ari baruh projek Bekal Ai Menua Pesisir (BALB).
Bayar nya mungkur empat kilometer keterubah ngagai 74 iku peranak ti ngempu tanah di sepemanjai jalai nya.
Laluh bayar pampas empat kilometer agi ungkup bala penerima dipadahka Komisioner Tanah enggau Survei benung disediaka.
Maya pengerami nyuaka chek nya ti diatur ba Bilik Baum Opis Tanah enggau Survei Bagi Menua Sri Aman, semina enam penerima di kangauka datai ti nyadi simbolik nyuaka nya nitihka SOP COVID-19, lalu ke bukai nya deka diserah ngagai Opis Tanah enggau Survei Bagi Menua Sri Aman ngagai pengempu tanah.
Ku Harden, jaku tuduh sekeda orang ti madahka perintah sepeneka ati ngambi tanah rayat nya bula sereta dikena ngerachun runding rayat.
Tuju ngambil tanah individu nya endang kena ngaga pemansang infrastruktur ti deka ngelantangka rayat menua nya, ku iya.
Ku iya, penyakal berasai teguran ati meda pemansang ti dibai perintah Gabungan Parti Sarawak (GPS), nya kebuah sida semampai ngerachun runding rayat ngambi begedika perintah lalu milih sida.
"Taja pia, sida enda sekali – kali setanding enggau penau perintah GPS ti nyata konsisten denggau semaya pemansang," ku iya nyemetak.
Sama bisi ngulu pengawa nya Pemangku Residen Bagi Menua Sri Aman Elvis Didit, Pemesai Pelilih Sri Aman Mohd Ashree Wee, Komisioner Tanah enggau Survei Bagi Menua Sri Aman, Doris Synia enggau bala bukai.