KUCHING: Perintah besai udah madahka diri setuju berundingka ubah ari baruh Pekara160 Konstitusyen Perintah Besai nengah chara ngenipakka nya enggau Sempekat Malaysia 1963 (MA63).
Kepala Menteri, Datuk Patinggi Abang Johari Tun Openg madahka ungkup konstitusyen nya mesti diubah kena mandangka Konstitusyen Perintah Besai bepelasarka MA63.
Ku iya, leka jaku”Persekutuan” ukai agi mai reti Perintah Besai ti ditumbuhka ari baruh Sempekat Perintah Besai Tanah Melayu 1957.
“Pengudah ubah nya digaga, nya tau ngasuh kaul perintah besai enggau perintah nengeri Sarawak nyadi manah agi setipak enggau MA63.
“Aku meri kasih ngagai Menteri Besai Tan Sri Muhyiddin Yassin udah udah setuju berandauka ubah nya silik agi enggau perintah nengeri,” ku iya.
Iya madah munyi nya maya ba aum media pengudah bejadi pengawa ngerami Penumbuh Ke-20 Universiti Teknologi Swinburne Kampus Sarawak ditu, kemari.
Abang Johari nyemetak madah, utai ti dipinta Sarawak iya nya “Persekutuan” ti mai reti perintah besai ti ditumbuhka ari baruh MA63.
“Persekutuan”reti nya Perintah besai ti ditumbuhka ari baruh Sempekat Perintah BesaiTanah Melayu, 1957 “, ku iya.
Ku iya, pekara ti dipadahka bekaul konstitusyen nya nadai kaul enggau kaul Gabungan Parti Sarawak (GPS) enggau Perikatan Nasional (PN) baka ti diripotka media lebuh ti nemuai seraya kereja ke Lubok Antu kena Hari Dua tu tadi.
“Pekara ti dipadahka aku sentang konstitusyen iya nya, enti udah diubah tentu bisi pemutus digaga entara perintah besai bepelasarka MA63,” ku iya.
Sebedau tu perintah besai ke suba, Pakatan Harapan (PH) kena bulan April 2019 udah meri langgur penemu bekaul ubah ba Pekara 1 (2) Konstitusyen Perintah Besai ti nguji mulaika status Sabah enggau Sarawak nyadi bakih ke sema penuduk enggau Semenanjung Malaysia.
Taja pia ku Abang Johari, langgu ba ubah nya enda masuk akal laban beratika “Persekutuan” nya agi ari baruh Sempekat Perintah Besai Tanah Melayu, 1957.