KUCHING: Kena ngangkatka akauntabiliti enggau kredibiliti dalam proses meri servis, Opis Menteri Perengka Pengangkut Sarawak (MOTS) bejadi Pelin Antirasuah Organisasyen Opis Menteri Perengka Pengangkut Sarawak (OACP MOTS 2021-2025), kemari.
Pelin nya dipenyadi Menteri iya, Datuk Lee Kim Shin ti diatur di BCCK ditu, ti fokus ngagai empat pekara bidang besai iya nya 'Pengurusan Projek dan Kajian Penyedilikan'; 'Perolehan dan Kewangan'; 'Tadbir Urus Awam' enggau 'Pengurusan Sumber Manusia'.
Nya mega nyengkaum empat strategi, lima objektif strategik enggau 48 pelan tindkanan nyengkaum 11 inisiatif timpuh pandak enggau 38 inisiatif timpuh panjai.
Enggau juluk ngangkatka akauntabiliti enggau kredibiliti dalam proses meri servis MOTS, pelin tu mega mantu opis menteri betapi isu tadbir ngatur, integriti enggau antirasuah ti mungkur semua ti setipak enggau Perintah YAB Menteri Besai No.1 Taun 2018 enggau Siri 2 No.1 Taun 2019 sereta Surat Tesau Integriti Negeri Sarawak Bil 1 Taun 2020.
Pelin tu beguna amat ba sektor perengka pengangkut ti deka dikemendarka dalam Langgur Pemansang Malaysia Lumpar Ke-12 Nengeri Sarawak dipejalaika enggau nyata sereta meri penguntung ngagai raban ti ditagit.
OACP tu asil kerejasama enggau pekara dipesetuju sechara kolektif raban MOTS nengah bengkel ti diatur kena 16 - 18 Disember 2020.
Status nyadi opis menteri ke baru enda nagang MOTS ngemansangka OACP ti komprehensif dalam timpuh pandak.
Sama bisi datai ngulu pengerami nya, Menteri Muda Perengka Pengangkut Datuk Dr Jerip Susil, Sekretari Mendam, MOTS Datu Buckland Bangit enggau ke bukai.