SIBU: Koordinator Komiti Mutarka Penusah Ngenyit Bagi Menua Sibu, Dr Annuar Rapaee muji peranak Sibu Jaya ti udah mujur mantu ngurangka kes COVID-19 di pasar baru nya.
Sibu Jaya ku iya, semina ngerikod siti satu kes ensanus iya nya ba Teres F, Lurung Sibu Jaya 16E.
"Flat di Sibu Jaya udah betukar ari Zon Mirah ngagai Zon Oren.
"Peranak dia dipeda keran deka ke Sibu Jaya betukar nyadi gadung.
"Nadai agi Zon Mirah di Sibu Jaya.
"Sehari tu kandang flat enggau Town Villa nadai ngerikos sebarang kes," ku iya 'live' bekaul kes COVID-19 di Sibu nengah Facebook, ensanus.
Dr Annuar ke mega ADUN Nangka pechaya amat kes di Sibu ulih dijaga nyega semua majak nitihka prosedur operasyen standard (SOP).
"Tu nyata dipeda di Sibu Jaya.
"Ngarapka semua peranak terus baka tu ngambika kitai tau nyambut puasa, Hari Raya Aidilfitri enggau Gawai," ku iya.
Ensana, pelilih Sibu ngerikodka 40 kes positif COVID-19 ke alai 38 kes diripotka ba sekeda zon ari baruh pegai Kaunsil Mengeri Sibu (MPS) enggau sama bisi siti kes di Sibu Jaya enggau sekeda zon ari baruh pegai Kaunsil Pelilih Menua Pesisir Sibu (MDLBS).
Ari 40 kes positif COVID-19 nya, 22 kes kontak semak ti bekaul enggau bakih sama kereja enggau diri sebilik ti diau serumah.
"Enti kita ngasika SOP ba endur kereja, kita ulih nyeliahka diri taja pan kita kontak semak ba opis.
"Tu nyengkaum ngena sengkabung idung enggau mulut setegah mua enggau betul nyengkaum suah masu jari.
"Tang ke beguna amat, sapa ke positif ba endur kereja, tumu madah ngagai bala bakih ngambika bala bukai tau dikuarantin lalu seda enda ngerampit diri sebilik di rumah," ku iya seraya madah, dua kes diripotka ba palan kuarantin, empat beperesa bisi kelai enggau 12 kes komuniti.
Ku Dr Annuar, nyentuk hari ketiga dalam minggu ke-13, bisi 104 kes COVID-19 udah diripotka di Sibu.
"Enti kitai meda ari penyampau kes, dipelabaka kes kitai kurang ari 302 kes ti dipripotka ba minggu nyin tadi.
"Enti nadai kes tauka kluster baru, dipelabaka kitai ulih ngurangka kes," ku iya.
Kelimpah ari nya ku Dr Annuar, nadai agi Zon Mirah di pasar Sibu lalu majoriti zon ari baruh pegai MPS betukar status ngagai Kuning.