KUCHING: Kepala Menteri Datuk Patinggi Abang Johari Tun Openg bekunsi peneleba enggau pengerai iya, seraya madah diri gerai tauka nadai apa nama pengudah dituchuk vaksin COVID-19 sereta meransang rayat nengeri tu ngambika ngerejista lalu enda takut nerima tuchuk nya.
Abang Johari bekunsi penelaba iya ba aum pengarang berita nyerumba pengerami bejadi Program Imunisasi COVID-19 Nengeri Sarawak ti diatur ba Stadium Perpaduan Negeri ditu, kemari.
“Pengudah nerima dos keterubah, penatai aku pagi tu ba Stadium ngayanka tuchuk vaksin nya likun. Aku nadai ngasaika empas ti enda manah (side effect) ari kemari, lebih regas agi.
“Nya alai aku mesan semua rayat Sarawak, anang takut ngerejista enggau datai nerima tuchuk vaksin (COVID-19) Pfizer-BioNTech ke udah dikemendarka National Pharmaceutical Regulatory Agency (NPRA).
“Aku minta (rayat) ngambika ngerejista nengah aplikasyan MySejahtera ke ulih di ‘download’ ba telefon kita, tauka ngelawa opis pelilih menua ke semak, klinik tauka palan pengerai, tauka enti ba genturung pendiau tauka rumah panjai ngagai Tuai Rumah, Tuai Genturung Pendiau tauka Kapitan ba endur kita empu,” ku iya.
Ensanus, Abang Johari entara orang ke dulu nerima tuchuk vaksin COVID-19 bansa Pfizer-BioNTech dos keterubah ba Klinik Pengerai Petra Jaya ditu begulai enggau Sapit Kepala Menteri Datuk Amar Awang Tengah Ali Hasan, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Direktor Opis Pengerai Nengeri Sarawak Dr Chin Zin Hing sereta raban terabai menua iya nya bala staf pengerai.
Nitih ku Abang Johari dos kedua vaksin nya deka diterima iya kena 19 Mac 2021.
Bejaku baru iya madahka Sarawak bisi program meri vaksin ngagai lebih 2 juta rayat ke patut enggau mega 200,000 ukai peranak menua ti mungkur 70 peratus peranak nengeri tu ngambika ulih datai ba tikas ‘herd immunity’.
“Program tu dipejalaika tiga renggat dalam timpuh tujuh bulan berengkah ari bulan Februari ngagai Ogos 2021 sereta bepanggai ngagai bekal vaksin.
“Kemari (ensanus) kitai udah nyapai tagit 1,688 iku diberi vaksin. Berengkah sehari tu (kemari) ngagai bulan Ogos program tu deka diteruska.
“Enggau tu aku ngarapka kitai ulih mutuska rentayan COVID-19 sereta kitai ulih idup baka sebedau tu tang ngemeranka norma baru baka agi ngena sengkabung idung enggau nyawa nyentuk penyakit tu amat punas,” ku iya.
Ku iya, penyampau bekal ti keterubah dianjung ba renggat keterubah bisi 23,400 dos ti diungkupka dikena nuchuk 97,161 raban terabai menua iya nya lima (5) peratus, berengkah ari ensanus ngagai 31 Mac 2021.
Renggat kedua, Sarawak deka nerima enam pemeri vaksin COVID-19 Pfizer-BioNTech enggau penyampau 87,750 dos ti mungkur 956,435 iku penerima tauka 72 peratus, ti diungkup ngagai raban orang lunggar umur ba bulan April enggau Mei.
Renggat ketiga, Sarawak deka nerima enam agi pemeri enggau raban ke ditagit 999,834 individu ti beumur 18 taun ke atas tauka 43 peratus dalam timpuh entara Mei ngagai Ogos, ku iya.
“Vaksin tu deka dianjung ngagai 54 palan ti ditentuka alai meri vaksin ba serata nengeri.
“Program tu latih ti chukup tusah laban begunaka perambu ke chukup besai, mayuh pengereja pengawa enggau logistik laban nengeri kitai besai.
“Tang aku arap bendar Komiti Mutarka Penusah Ngenyit Nengeri Sarawak (JPBNS) ti bechairman Datuk Amar Douglas Uggah Embas enggau raban iya ulih bejalaika tu enggau mujur,” ku iya.
Sama bisi ba aum pengarang berita nya kemari, Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Direktor Opis Pengerai Nengeri Sarawak Dr Chin Zin Hing enggau sida ke bukai.