Anda di sini

Perintah Sarawak tetap ngemeratka pengerai rayat

Advertisement

KUCHING: Taja pan vaksin COVID-19 udah bisi, perintah Sarawak tetap  lebih ngemeratka pengerai rayat enti dibandingka enggau ngatur pengawa bepilih nengeri (PRN) ke deka datai tu.

Kepala Menteri Datuk Patinggi Abang Johari Tun Openg madahka, tambah mega menua diatu agi dalam timpuh darurat ti enggau tuju dikena nagang virus nya ari terus berampit.

“Kitai agi dalam darurat, pengawa bepilih nya dudi laban sebarang maya ulih diatur, tang nyawa enda ulih dua tiga kali.

“Nya alai , utai ke dikereja kami (perintah nengeri) diatu iya nya fokus tauka ngemeratka pekara pengerai,” ku iya lebuh ditanya pengarang berita sekalika pengawa bepilih nengeri (PRN) Ke-12 deka diatur berindik ari vaksin ke udah datai.

Iya nerangka pekara nya ba aum pengarang berita nyerumba bejadi Program Imunisasi COVID-19 Nengeri Sarawak ba Stadium Perpaduan Negeri ditu, kemari.

Berebak enggau tu ku iya, perintah Sarawak udah ngungkupka mayuh belanja dikena ngelaban COVID-19 ba nengeri tu.

Kenyau ari taun 2020 dikena ngelaban COVID-19 ba nengeri tu, ku iya, perintah nengeri udah melanjaka RM72 juta.

Nambahka nya, perintah nengeri mega setuju mantu perintah besai iya nya Sarawak ngemendarka RM30 juta ke belanja dika nganjung vaksin COVID-19 lebih agi ngagai kandang menua ulu ngambika semua rayat ampit tuchuk vaksin tu, ku iya.

“Perintah Sarawak lebih ngemeratka pekara pengerai. Kami nadai berundingka utai bukai, kami semua ngerundingka pasal pengerai dulu, keterubah iya kuarantin.

“Kitai patut ngengkahka kediri orang ari kena empas COVID-19, reti nya diengkah ba hotel lalu hotel minta duit, nambah nya sida ke diengkah kediri tauka diau ba hotel nya tentu mega makai, semua nya dikereja perintah nengeri. Kelimpah ari nya mantu sereta nyaga pengelantang pendiau rayat ti kena empas COVID-19.

“Nya alai, utai ti dikereja kami diatu iya nya perintah nengeri lebih ngemeratka pengerai.  Duit ulih digiga, nyawa dini ulih digiga, kitai bepalsarka prinsip nya,” ku iya.

Sama bisi ba aum pengarang berita nya, Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah Dato Sri Dr Sim Kui Hian enggau sida ke bukai.

Advertisement