SIBU: Presiden Parti Demokratik Progresif (PDP) Dato Sri Tiong King Sing udah mujur minta bantu dalam sektor betanam betupi sepenyampau RM1 juta ungkup raban pekebun di kandang menua Dudong.
Dalam penerang media nya kemari, Tiong ti mega Kaban Parlimen (MP) Bintulu madah, bantu tu nyengkaum baja, rachun, sereta kereban enggau manchit.
Ku iya madah, bantu tu udah berengkah diagihka kena pun minggu tu ti disuaka ngagai Chairman PDP Sitak Dudong Kunsilor Teo Boon Siew ngagai bala pekebun.
Beserimbai enggau nya, Teo madahka bisi 22 iku raban pekebun udah nerima bantu tu ti nyengkaum baja enggau rachun.
Ku iya nambah, pengawa meri bantu tu denung diproses diatu.
“Pengudah kami nerima (bantu), kami deka ngagihka nya terus kena mantu ngelempungka tating bala pekebun ti tekeruga,” ku iya.
Ba pengerami nyuaka bantu tu mega udah sama digulu Penulung Pemesai Opis Betanam Betupi Bagi Menua Sibu Sofri Tegong.