SIBU: Ukum RM1,000 ngagai orang ti salah ke enda ngasi sereta ngelanggar rosedur Operasyen Standard (SOP) COVID-19 diasaika engkeman.
Sapit Chairman Dewan Usahawan Bumiputera Pampang Sibu (DUBS) Jimbau Galau madah, penyampau ukum tu enda patut ditikika.
Ku iya, mayuh rayat diatu benung tusut runding ari sukut mental, fizikal enggau ekonomi berindik ari pengelekai pandemik tu.
“Ba penemu aku, endang enda patut penyampau ukum tu ditikika laban ba aku ke pemadu berat iya nya pengawa neritka atur mesti seruran dipejalaika.
“Kelimpah ari nya, semua pekara patut ngira pun ti ngasuh orang ke enda ngasika SOP tu nyadi,” ku iya lebuh ti ditelefon kemari.
Nitih ku Jimbau, perintah mega patut mansik enggau silik pun pekara ti ngasuh orang enda ngasika SOP ke udah ditetapka, kelimpah ari bebendar ngangkatka tikas penemu rayat bekaul enggau SOP.
Ku iya madah, perambu deka nikika penyampau ukum ukai chara mutarka nya, tang semina majakka orang ke enda ngasika atur ketegal lama ‘bekurung’ laban SOP ti udah ditetapka.
“Tanya ya ditu, sekalika chara nikika penyampau ukum nya endang ngasi mutuska rentayan pengelekai pandemik COVID-19 tauka enda?,” ku iya nanya.
Ku iya, taja perambu nikika penyampau ukum tu ngambika orang ngasika agi SOP, tang nya deka ngujungka mayuh empas ti enda manah ari ti manah.
“Diatu, pandemik CVID-19 udah ba dalam komuniti enggau sekeda ari nya enda ditemu bakani ulih kena rampit.
“Nya alai, ke pemadu beguna diatu, kelimpah ari neritka atur, raban ti bekaul patut ngemeratka penemu ngagai komuniti sereta penerang ti betul bekaul enggau netapka SOP,” ku iya.
Opis Luyar Menua kena Hari Empat udah mantaika Ordinan Darurat Nyeliah enggau Nagang Penyakit Berampit (Ubah) 2021 nengah Warta Kerajaan Persekutuan.
Nya madahka individu ti ngelanggar SOP kena nyeliah enggau nagang pendemik COVID-19 ulih ditinggang ukum maksimum R<10,000 berengkah 11 Mac.
Entara penyalah ke ulih ditinggang ukum iya nya enda ngena sengkabung idung enggau mulut, enda nitihka seraka fizikal, enda nyendiaka kereban kena ngerikodka penerang penguna, mindah entara pelilih menua/ nengeri ti nadai pemendar lalu akitiviti ba palan pemerindang.