GEDONG: Soldadu Darat Malaysia (TDM) nagit 80 peratus ari 56 iti Projek Jiwa Murni ti diperambu sida iya di serata menua taun tu, ulih digaga tembu nyerumba ujung taun, taja pan betapi enggau pandemik COVID-19.
Panglima Soldadu Darat Jen Tan Sri Zamrose Mohd Zain madah, semua projek nya begunaka ungkus belanja urung RM3 juta.
“Aku semina ulih meri jamin 80 peratus ulih digaga tembu lalu laluh 20 peratus, kami enda nemu laban sebarang utai tau nyadi ba maya (COVID-19) diatu,” ku iya m adah ngagai pengarang berita pengudah Pengerami Ngelanchar Projek Jiwa Murni beserimbai enggau Hari Soldadu Darat ke-88, ditu kemari.
Ku iya, ngambika projek ulih tembu digaga, TDM minta agih belanja ari perintah nengeri ke bekaul.
Di Sarawak, perintah nengeri udah setuju merik agih belanja RM1.5 jutaungkup ungkus kos ngaga 22 Projek Jiwa Murni dalam kandang menua Gedong, Simunjan enggau Sadong Jaya, ku iya.
“TDM deka majak komited mantu rayat ti begunaka nya kelebih agi raban ti napi pemar ketegal pengelekai penyakit COVID-19,” ku iya.
Ungkup Gedong, projek nya mungkur pengawa nyeruri rumah siku peranak di Kampung Gedong, Rahim Bujang Ahmad ti udah laban ngenatka penyakit strok.
Ku Zamrose, projek nya ti dipejalaika 3 Skuadron Rejimen Askar Jurutera Diraja mega bisi diberi bantu belanja ari Kaban Kunsil Nengeri Gedong, Datuk Mohd Naroden Majais. — Bernama