Anda di sini

Operasyen nyaga pengelikun garis entara menua dipajakka

Advertisement
 Masing (kanan) benung mendingka licha bekaul enggau pengelikun garis entara menua di nengeri Sarawak ba opis iya ditu, kemari. Sama bisi Mancha (dua kanan).
MENDINGKA PENERANG: Masing (kanan) benung mendingka licha bekaul enggau pengelikun garis entara menua di nengeri Sarawak ba opis iya ditu, kemari. Sama bisi Mancha (dua kanan).

KUCHING: Sapit Kepala Menteri Tan Sri Datuk Amar Dr James Jemut Masing madah, sekeda operasyen bekaul enggau nyaga pengelikun ba garis entara menua di nengeri tu deka dipajakka.

Iya madah, operasyen nya baka JPG Op Awas Pos Merirai, Op Benteng Tapak Megah enggau Pos Long Singut endang kena neritka agi pengawa nyaga garis entara menua di Nengeri Sarawak.

“Pangkalan Hadapan Tapak Megah deka bejalaika tanggunpengawa nyadi pos mendam enggau penyampau 26 raban (penerit adat) laban ke semak enggau palan pengentap pendiau Long Nawang, semina 20km ari garis entara menua.

“Dalam timpuh lima taun ari diatu, indu menua Indonesia deka dipindahka ngagai Palangkaraya, Kalimatan lalu  tu semak enggau Sarawak,” ku iya pengudah mendingka licha pasal pengelikun ba garis entara menua nengeri tu ditu, kemari.

Masing ti mega Chairman Komiti Nyaga Pengelikun Garis Entara Menua, madahka Pangkalan Hadapan Megah ukai semina ngenegapka agi pengelikun Sarawak tang mega nyaga sumber berega nengeri tu baka Tekad Hidro Elekterik Bakun,  Tekad Hidro Elekterik Bakun,  Tekad Hidro Elektrik Murum enggau Tekad Hidro Elekterik Baleh.

Bejaku baru ku iya, pos nyaga pengelikun ba Sungai Tunoh mega deka mantu pengawa nyaga pengelikun ba garis entara menua nengeri.

“Laban pengawa nyaga pengelikun  garis entara menua pekara ti dikemeratka, Perintah Sarawak setuju ngungkupka belanja dikena meli mutosikal ‘Scambler’ tauka ‘off-road’ enggau perengka pengngkut ATV ke ulih nengah kandang endur ke enda rata.

“Tu nyengkaum kereban komunikasyen kena nentuka penyambung penerang ulih dipajak enda ngeruga ari pos garis entara menua ngagai indu opis,” ku iya.

Ku iya, laban pengawa nyaga garis entara menua pekara ti pemadu beguna, endang patut perintah nengeri minta bayar baru semua belanja ti dikena bejalaika tuju nya ari Putrajaya.

Masing madah, urung ninting hari Pasukan Gerakan Am (PGA) enggau Polis Diraja Malaysia (PDRM) ngeripotka orang tama belalai (PATI) ari Indonesia nengah garis entara menua nengeri.

“Ninting hari lebih 10 iku PATI ditangkap nguji tama ke Sarawak. Tu ukai semina irauka garis entara menua kitai dipasuk enggau enda beradat,tang enggau penyadi pandemik COVID-19 diatu, kitai irauka sida ulih tauka bisi mai virus,” ku iya.

Sama bisi datai, Komander Briged Sarawak PGA SAC Mancha Adan, Pegawai Turus Gerakan/Risik Briged Sarawak PGA DSP Sahamran Ibrahim.

Advertisement