KUCHING: Opis Pengerai Nengeri Sarawak kemari netapka siti kluster baru COVID-19 ba Pelilih Menua Betong iya nya Kluster Jalai Muhibbah.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka kluster baru iya nya kluster komuniti ba sebuah rumah alai diau ba Jalai Muhibbah ba Pasar Betong.
“Kluster Jalai Muhibbah ba Pelilih Menua Betong iya nya kluster komuniti ti nyadi ba sebuah rumah alai diau, Jalai Muhibbah di Pasar Betong ti nyadi ari pengawa begempuru rama kena 10 Februari 2021.
“Indeks kes kluster tu iya nya kes ke-7,407 siku lelaki beumur 50 taun peranak menua (Sarawak) ditemu nengah pengawa meresa bisi kelai kena 16 Februari 2021. Kes indeks bisi kelai kena 14 Februari 2021.
“Asil ari pengawa meresa enggau nyidi kontak semak indeks kes tu, bisi 110 individu udah diperesa lalu ari penyampau nya bisi 18 kes ditemu positif COVID-19 ti nyengkaum indeks kes; 45 individu negatif enggau 47 individu agi nganti pemutus,” ku JPBNS.
Semua 18 kes bekaul enggau Kluster Jalai Muhibbah, Betong udah dipasukka ngagai Sepital Sarikei enggau PKRC Sarikei ngambika enda begulai sereta awakka ulih diperubatka.
Kelimpah ari nya kemari, JPBNS nengah penerang ti sama madah Kluster Bah Sayap, Miri ditetapka nadai agi berampit berindik ari nadai kes baru diripotka.
Bisi 1,047 individu ti bekaul enggau kluster tu udah diperesa iya nya 96 kes ditemu psositif COVID-19 enggau 951 individu negatif.
“Sehari tu, Opis Pengerai Nengeri Sarawak udah netapka Kluster Bah Sayap ba Pelilih Menua Miri nyadi kluster punas pengudah nadai kes baru ditemu tauka diripotka dalam timpuh 28 hari ari hari bulan ke penudi ditemu.
“Semua 96 kes bekaul enggau kluster tu udah pansut sereta dikemendarka pulai. Nadai kes pemati diripotka bekaul enggau kluster tu,” ku JPBNS.
Berindik ari nya, penyampau kluster COVID-19 ke agi aktif ba nengeri tu naka kemari bisi 25 kluster.
Dua puluh lima (25) kluster ke agi aktif nyengkaum Kluster Jalan Muhibbah, Betong; Kluster Emperoh Jambu, Kuching; Kluster Sungai Bakong, Meradong; Kluster Jalan Green, Kuching; Kluster Kejatau, Sri Aman; Kluster Jan Yong, Kapit; Kluster Geronggang, Sibu; Kluster Mas Merah, Sibu; Kluster Univista, Samarahan; Kluster Kampung Sungai Maong, Kuching; Kluster Gelong, Kapit; Kluster Kidurong Dua, Bintulu; Kluster Nanga Lijan, Julau; Kluster Seruas, Beluru; Kluster Sebangkoi, Sri Aman; Kluster Jun Heng, Bintulu; Kluster Bintangor Daily, Meradong;
Nambahka nya, Kluster Jalai pengiran, Matu; Kluster Tabong, Bau; Kluster Indah Riang, Kuching; Kluster Bedayan, Serian; Kluster Rakut, Miri; Kluster Bukit Sekubong, Sebauh; Kluster Jelita, Miri enggau Kluster Pasai, Sibu; a) Sub-Kluster Tangap (Subis).