Anda di sini

COVID-19: Dua kes pemati,133 kes baru positif di Sarawak kemari

Advertisement

KUCHING: Bisi 133 kes baru positif COVID-19 enggau dua kes pemati ketegal COVID-19 diripotka di Sarawak, kemari.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah nya ngujungka penyampau semua kes positif COVID-19 nambah nyadi 8,164 kes enggau 76 kes pemati naka kemari.

“Sehari tu bisi 133 kes baru COVID-19 ditemu ba Sarawak. Pelilih Menua ti ngeripotka kes baru nya nyengkaum Pelilih Menua  Meradong (36), Sibu (28), Betong (17), Samarahan (13), Kuching (12), Bintulu (8), Julau (6), Subis (6), Miri (3), Saratok (1), Kanowit (1), Beluru (1) enggau Dalat (1).

“Bekaul enggau kes pemati, sehari tu bisi dua kes baru ti bekaul enggau rampit COVID-19. Tu ngujungka penyampau semua kes pemati nambah nyadi 76 iku tauka sepenyampau 0.92 peratus ari semua kes positif ti diripotka ba Sarawak,” ku JPBNS.

Bepelasarka penerang JPBNS, bisi 17 (ba Pelilih Menua Betong) ari semua 133 kes baru COVID-19 iya nya bekaul enggau kluster baru ti ditemu ba nengeri tu iya nya Kluster Jalai Muhibbah, Betong.

Nitihku penerang ari JPBNS, kes pemati ke-75 iya nya kes ke-5,850 siku lelaki peranak menua (Sarawak) beumur 41 taun ti udah diperubatka ba Sepital Sibu.

Kes ti asal ari menua Sibu bisi tanda baka tabin enggau batuk beberapa hari sebedau berubat enggau diperesa COVID-19, sereta pemutus ujian rT-PCR ditemu positif kena 8 Februari 2021.

Tikas pengerai kes majak enda manah sereta ditetapka udah nadai kena 22 Februari 2021, ku JPBNS.

Lalu kes pemati ke-76 iya nya kes ke-6,668 siku lelaki peranak menua (Sarawak) beumur 74 taun ti udah dipasukka ba Sepital Sibu lebuh pemutus peresa rT-PCR nyadi kontak semak iya nya psotif COVID-19.

Kes sebedau nya nadai ngayanka sebarang kelai dirampit COVID-19 lalu tikas pengerai majak enda madah enggau ditetapka udah nadai kena 23 Februari 2021.

“Kes (ke-76) bisi ko-morbid Parkinson. Kes tu asal ari Pelilih Menua Sibu enggau bisi kaul dalam Kluster Geronggang,” ku JPBNS.

Kelimpah ari nya JPBNS neripotka bisi 214 kes baru udah gerai sereta dikemendarka pansut ari sepital kemari iya nya Sepital Sibu  (149), PKRC Sepital Kapit (34), Sepital Besai Sarawak (15), Sepital Miri (8), Sepital Sarikei (5),Sepital Bintulu (2) enggau PKRC Sepital Sri Aman (1).

“Tu ngujungka penyampau semua kes positif COVID-19 ke udah gerai tauka dikemendarka pansut ari sepital naka sehari tu (kemari) bisi 6,099 iku tauka 73.51%  ari penyampau semua kes COVID-19 ba Sarawak,” ku JPBNS.

Kemari mega bisi 162 PUI baru diripotka enggai 11 PUI agi nganti pemutus peresa makmal.

Advertisement